आगामी विधानसभा निवडणुकीच्या पार्श्वभूमीवर काँग्रेसकडून मोठी तयारी सुरू केलीय. महाराष्ट्रातही काँग्रेस नेते आपल्या पक्षातील मोर्चेंबांधणी करण्यास सुरुवात केलीय. त्याचाच भाग म्हणून जोरात इनकमिंग सुरू केली आहे. भाजप आणि राष्ट्रवादी काँग्रेस (शरदचंद्र पवार) पक्षाला जोरदार धक्का दिलाय. या दोन्ही पक्षातील महत्त्वाच्या नेत्यांना काँग्रेसनं गळाला लावलंय. माजी मंत्री वामनराव नाईक यांच्या नात गितांजली नाईक यांनीही काँग्रेसमध्ये प्रवेश केलाय.

टिळक भवन येथे हा पक्षप्रवेश सोहळा पार पडलाय. बीड जिल्ह्यातील राष्ट्रवादी काँग्रेस (शरदचंद्र पवार) पक्षाचे नेते ॲड. नरसिंह जाधव यांनी कार्यकर्त्यांसह काँग्रेसमध्ये प्रवेश केलाय. भाजप शिक्षक आघाडी व उत्तर महाराष्ट्र खान्देश विकास मंडळ कल्याणचे अध्यक्ष विकास मुकुंदराव पाटील यांनीही शेकडो कार्यकर्त्यांसह काँग्रेसमध्ये प्रवेश केला. नवनियुक्त प्रभारी डॉ. सिरिवेल्ला प्रसाद आणि प्रदेशाध्यक्ष हर्षवर्धन सपकाळ यांनी पक्षात प्रवेश केलेल्या नेत्यांचे स्वागत केलं.

यावेळी बोलताना डॉ. सिरिवेल्ला प्रसाद यांनी काँग्रेसची संघटनात्मक ताकद वाढवण्याचे आवाहन कार्यकर्त्यांना केलंय. बीडसह ज्या जिल्ह्यांमध्ये पक्षांची ताकद नाहीये, तेथे संघटनात्मक ताकद अधिक बळकट करण्यासाठी प्रयत्न केलं पाहिजे, जोमाने काम करून संघटनेची ताकद वाढविण्याची गरज असल्याचे सिरिवेल्ला यांनी सांगितले. २०२९च्या लोकसभा निवडणुकीसाठी आतापासूनच तयारी करण्याचे आवाहनही त्यांनी कार्यकर्त्यांना केले.

प्रदेशाध्यक्ष हर्षवर्धन सपकाळ यांनी काँग्रेसचा विचार गावागावात पोहोचविण्याचे आवाहन या पक्षप्रवेश सोहळ्यावेळी केलं.बीड जिल्ह्यासह खान्देशात झालेल्या पक्षप्रवेशामुळे काँग्रेसची संघटनात्मक ताकद वाढण्यास मदत होईल, असे त्यांनी सांगितले.