Narayan Rane Vs Vinayak Raut : केंद्रीय मंत्री नारायण राणे आणि शिवसेना (उद्धव बाळासाहेब ठाकरे) खासदार संजय राऊत यांच्यात शाब्दिक 'फटकेबाजी' सुरू असतानाच, खासदार विनायक राऊत यांनी मोठा 'राजकीय फटाका' फोडला आहे. केंद्रात मिळालेलं मंत्रिपद पुढचे चार महिने टिकतं का, याची काळजी नारायण राणेंनी घ्यावी, असं विनायक राऊत म्हणाले.

शिवसेना (उद्धव बाळासाहेब ठाकरे) खासदार विनायक राऊत (Vinayak Raut) यांनी रत्नागिरीत प्रसारमाध्यमांशी संवाद साधला. शिवसेना, उद्धव ठाकरे आणि संजय राऊत यांच्यावर टीकेची तोफ डागणाऱ्या नारायण राणेंवर राऊत यांनी 'प्रहार' केला. यावेळी त्यांनी नारायण राणेंच्या केंद्रातील मंत्रिपदाबाबत मोठी भविष्यवाणी केली.

केंद्रात मिळालेलं मंत्रिपद पुढील चार महिने टिकते का त्याची नारायण राणे (Narayan Rane) यांनी काळजी घ्यावी, असं विनायक राऊत म्हणाले.

नारायण राणे यांच्यासारख्या गद्दार आणि स्वार्थी माणसाचं आम्ही मनावर घेत नाही. आपलं अस्तित्व टिकवण्यासाठी नारायण राणे हे शिवसेनेवर टीका करत आहेत, असंही ते म्हणाले.

नारायण राणे यांचे वक्तव्य आम्ही गांभीर्याने घेत नाही. स्वतःच्या आणि कुटुंबीयांच्या स्वार्थासाठी त्यांनी शिवसेनेशी (Shivsena) बेइमानी केली. काँग्रेसशी बेइमानी केली. त्यांनी पंतप्रधान नरेंद्र मोदी (PM Narendra Modi) आणि देवेंद्र फडणवीसांविषयी (Devendra Fadnavis) अपशब्द वापरले.

आता आपलं अस्तित्व टिकवून ठेवण्यासाठी उद्धव ठाकरे आणि शिवसेनेवर टीका करायची. हाच एक त्यांचा धंदा राहिला आहे. जे काही मंत्रिपद मिळाले आहे, ते पुढचे चार महिने टिकते की नाही याची त्यांनी काळजी घ्यावी, असा हल्लाबोलही त्यांनी केला.