विधानसभा निवडणुकीच्या तोंडावर राज्यात राजकीय घडामोडींना वेग आला आहे. विधानसभा निवडणूक लढवण्यासाठी अनेक जण इच्छुक असून त्यांच्याकडून प्रयत्न सुरू आहेत. अशामध्ये आपल्या वक्तव्यामुळे नेहमी चर्चेत राहणारे प्रसिद्ध वकील गुणरत्न सदावर्ते निवडणुकीच्या रिंगणात उतरणार आहे. गुणरत्न सदावर्ते वरळी विधानसभा मतदारसंघातून निवडणूक लढवणार आहेत. ठाकरे गटाचे नेते आदित्य ठाकरे यांना ते तगडी फाईट देणार आहेत.

नुकताच गुणरत्न सदावर्ते यांनी माध्यमांशी संवाद साधताना ही घोषणा केली. वरळी विधानसभा मतदारसंघामध्ये आदित्य ठाकरे यांना गुणरत्न सदावर्ते कडवं आव्हान देणार आहेत. मनसेचे नेते संदीप देशपांडे यांची वरळीत चर्चा सुरू असताना आता गुणरत्न सदावर्ते सुद्धा वरळीतून निवडणूक लढवणार असल्याने वरळीची लढत रंगतदार होणार असल्याचे दिसत आहे.

'मी वरळीतून निवडणूक लढवणार आणि आदित्य ठाकरे यांना धूळ चारणार.', असा निर्धार गुणरत्न सदावर्ते यांनी केला आहे. त्यांनी सांगितले की, 'गेल्या ५ वर्षांमध्ये वरळी मतदारसंघामधील सामान्य नागरिक त्रासून गेले आहेत. उद्धव ठाकरे यांचा मुलगा आदित्यने काहीच काम केले नाही. काही अभिनेत्रींच्या बाबतीत त्यांच्या जीवनयात्रा कशी संपली याच्याच चर्चा माध्यमांमध्ये आदित्यबाबतीत राहिल्या. त्याच्या व्यतिरिक्त आदित्यबद्दल काहीच चर्चा झाली नाही.'

'वरळीमधील सुज्ञ लोकांनी आणि सर्वजाती धर्माच्या लोकांनी ठरवले आहे की कायदेशीररित्या वरळीला उभं करणं गरजेचे आहे. वरळीचा विकास हा अधिकाधिक लोकांना प्रिय आहे. वरळीमध्ये आदित्य ठाकरेंनी काय केले. वीर जिजामाता नगरमधील माझ्या सामान्य नागरिकांना सांगितले की, माझ्या चेहऱ्याकडे बघून सह्या करा. बिल्डरच्या घश्यामध्ये ८ हजार कोटी रुपये घालण्याचे काम केले. आदित्य ठाकरेंना वरळीतील लोकं कंटाळले आहेत. महाविकास आघीडाला विरोध करण्यासाठी मी तिथून निवडणूक लढणार आहे. मी उद्धव ठाकरेंचा खरे-खोटेपणा दाखवून दिला. वरळीमधील लोकांची इच्छा आहे की मी निवडणूक लढावी.'