गोंदियामध्ये परिविक्षाधीन सहाय्यक धर्मादाय आयुक्त श्रीमती दिशा केशवराव पजई यांना लकी ड्रॉ सोडतीत महिंद्र एक्स यू वी ७०० हे वाहन जिंकणे भोवले आहे. याप्रकरणी आयुक्त दिशा केशवराव पजई यांना तत्काळ निलंबित करण्यात आले आहे. ही कारवाई राज्यशासनाच्या विधी आणि न्याय विभागातर्फे करण्यात आली आहे.

मिळालेल्या माहितीनुसार, खाजगी ज्वेलर्सद्वारे लकी ड्रॉ आयोजित करण्यात आला होता. या लकी ड्रॉमध्ये गोंदिया जिल्ह्यातील परिविक्षाधीन सहाय्यक धर्मादाय आयुक्त दिशा पजई यांनी महिंद्र एक्स यू वी ७०० ही चारचाकी जिंकली. पूर्वपरवानगी न घेता लकी ड्रॉ मध्ये चार चाकी वाहन मिळवून महाराष्ट्र नागरी सेवा वर्तणूक नियमाचा भंग केला.

याप्रकरणी दिशा यांच्यावर शिस्तभंगाची कारवाई करण्यात येणार आहे. त्यांना अनुमती शिवाय गोंदिया मुख्यालय सोडता येणार नसल्याचे आदेशात नमूद करण्यात आले आहे. संबंधित ज्वेलर्सच्या लकी ड्रॉ मध्ये चारचाकी जिंकणं आयुक्त दिशा केशवराव पजई यांना चांगलेच महागात पडले असून त्यांना निलंबित करण्यात येणार आहे. निलंबनाच्या कालावधीत त्यांनी कोणत्याही प्रकारची खाजगी नोकरी केल्यास किंवा व्यवसाय केल्यास गैरवर्तणूकीसाठी दोषी समजण्यात येऊन उचित कार्यवाही करण्यात येईल.