मुंबई : राज्यात विधानसभा निवडणुकीचे निकाल जाहीर होत आहे. विधानसभा निवडणुकीच्या निकालासाठी मतमोजणी सुरु झाली आहे. राज्यातील काही ठिकाणी ७ ते ८ व्या फेऱ्यांची मोजणी सुरु आहे. या मतमोजणीनुसार, राज्यातील सुरुवातीचे कल हाती आले आहेत. सुरुवातीच्या कलांमध्ये महाविकास आघाडीला मोठा धक्का बसल्याचे दिसत आहे. तर महायुतीने मोठी मजल मारली आहे. या लढाईत महायुतीसह महाविकास आघाडीचे दिग्गेज उमेदवार पिछाडीवर असल्याचे दिसत आहे. यामध्ये बाळासाहेब थोरात यांच्या नावाचा समावेश आहे.

राज्यात विधानसभा निवडणुकीच्या मतमोजणीला सुरुवात झाली आहे. या विधानसभा निवडणुकीच्या निकालाकडे साऱ्या देशाचं लक्ष लागलं आहे. या निवडणुकीच्या मतमोजणीत दिग्गज नेत्यांना झटका बसताना दिसत आहे. बाळासाहेब थोरात, तानाजी सावंत आणि अब्दुल सत्तार सारखे दिग्गज नेते पिछाडीवर दिसत आहे.

या निकालाने या दिग्गज नेत्यांची धाकधूक वाढली आहे. दुसरीकडे या मतमोजणीचे सुरुवातीचे कल महायुतीच्या बाजूने झुकलेले दिसत आहे. तरीही महायुतीमधील काही दिग्गज नेते पिछाडीवर असल्याचे चित्र आहे.

नगरमधील कर्जत-जामखेड विधानसभा मतदारसंघात शरद पवार गटाचे उमेदवार रोहित पवार पिछाडीवर असल्याचे दिसत आहे. तर काही फेऱ्यांमध्ये छगन भुजबळ देखील पिछाडीवर होते. मात्र, नंतरच्या फेरीत छगन भुजबळ यांनी आघाडी घेतली आहे. संगमनेर विधानसभा मतदारसंघात बाळासाहेब पिछाडीवर असल्याचे दिसत आहे. थोरात तब्बल ४४९२ मतांनी पिछाडीवर आहेत. त्यांच्या मतदारसंघात महायुतीचे अमोल खताळ आघाडीवर आहेत.

धाराशिवमधील परंडा विधानसभा मतदारसंघात दुसऱ्या फेरीखअखेर महायुतीचे तानाजी सावंत ५२९ मतांनी पिछाडीवर असल्याचे समोर आलं आहे. सिल्लोडमध्ये अब्दुल सत्तार पिछाडीवर गेले आहेत. पाचव्या फेरी अखेर अब्दुल सत्तार २०६ मतांनी पिछाडीवर आहे. तर ठाकरे गटाचे सुरेश बनकर हे आघाडीवर आहेत.

अमरावतीच्या तिवसा मतदारसंघात काँग्रेसच्या नेत्या यशोमती ठाकूर ४४३८ मतांनी पिछाडीवर आहेत. तर अचलपूर मतदारसंघात प्रहारचे बच्चू कडू जवळपास १६ मतांनी पिछाडीवर आहेत.