महाराष्ट्रातील औरंगाबाद शहराचं नामांतर छत्रपती संभाजीनगर झालं असलं, तरी रेल्वे स्थानकाचं नामांतर झालं नव्हतं. आता महाराष्ट्र सरकारने केंद्रीय अधिनियमान्वये यासंदर्भात नियम आणि आदेश लागू करत ‘छत्रपती संभाजीनगर’ नाव रेल्वे स्थानकाला देण्यासंदर्भात राजपत्र जारी केलंय. आता रेल्वे स्थानकावर धर्मवीर छत्रपती संभाजीराजे यांचं नाव झळकणार आहे.

दोन वर्षापूर्वी राज्य सरकारच्या मंत्रिमंडळाच्या बैठकीत औरंगाबाद शहराचं नाव छत्रपती संभाजीनगर करण्यात आलं होतं. काही दिवसांनी संपूर्ण जिल्ह्याचं नाव छत्रपती संभाजीनगर करण्यात आलं होतं. त्यावेळी औरंगाबादसह उस्मानाबाद जिल्ह्याचं नामांतर धाराशिव करण्यात आलं होतं. त्यावेळी राज्य सरकारने राजपत्र प्रकाशित करून दोन्ही जिल्ह्यांची नावे बदलल्याचे जाहीर केले होते.

औरंगाबाद जिल्ह्याचं नामांतर झाल्यानंतरही रेल्वे स्टेशनच्या नावात बदल करण्यात आला नव्हता. यासाठी अनेक लोकप्रतिनिधींनी पाठपुरावा केला. त्यानंतर राज्य सरकारने केंद्रीय अधिनियमान्वये यासंदर्भात नियम आणि आदेश काढत रेल्वे स्टेशनला धर्मवीर छत्रपती संभाजीराजे नाव देण्यासंदर्भात राजपत्र जारी केलं आहे. त्यामुळे लवकरच महाराष्ट्रातील औरंगाबाद रेल्वे स्टेशनचं नाव हे धर्मवीर छत्रपती संभाजीराजे असे होईल.

या नामांतरासाठी विशेष पाठपुरावा केल्याचा दावा ठाकरे गटाचे खासदार संजय जाधव यांनी केला आहे. खासदार संजय जाधव यांनी पोस्ट करत म्हटलं की, औरंगाबाद शहरास ‘छत्रपती संभाजीनगर’ हे ऐतिहासिक नाव देऊनही रेल्वे स्थानकाच्या नामांतराची प्रक्रिया अद्याप अपूर्ण होती. यासंदर्भात आपण सातत्यानं शासनाशी संवाद साधत राहिलो, पत्रव्यवहार केला.आज आनंदाचा क्षण आहे. महाराष्ट्र शासनानं केंद्रीय अधिनियमानुसार ‘छत्रपती संभाजीनगर रेल्वे स्थानक’ या नावास अधिकृत मान्यता देत राजपत्र अधिसूचना जारी केली आहे. हा निर्णय छत्रपती संभाजीराजांच्या तेजस्वी स्मृतींना केलेलं अभिवादन आहे. यापुढे स्थानकावर छत्रपती संभाजीराजेंचं नाव अभिमानानं लिहिलं जाईल, याचा आनंद आहे'.