सागर आव्हाड, पुणे

आगामी विधानसभा निवडणुकीसाठी (Maharashtra Assembly Election 2024) सर्वच राजकीय पक्षांनी कंबर कसली आहे. विधानसभेची निवडणूक पुढच्या दोन ते तीन महिन्यामध्ये जाहीर होण्याची शक्यता आहे. त्याचपार्श्वभूमीवर महाविकास आघाडी असो वा महायुती यामधील सर्वच पक्षांनी जोरदार तयारी सुरू केली आहे. जास्तीत जास्त जागांवर विजयी व्हावे यासाठी सर्वांकडून प्रयत्न सुरू आहेत. अशामध्ये एक मोठी बातमी समोर आली आहे. मुख्यमंत्रिपदाच्या शर्यतीत आणखी एका बड्या नेत्याचे नाव समोर आले आहे. राष्ट्रवादी काँग्रेस शरद पवार गटाचे नेते राजेश टोपे यांनी याबाबत मोठं विधान केले आहे.

'पुढील वारीला महविकास आघाडीचा मुख्यमंत्री पांडुरंगाची पूजा करेल. पांडुरंगाची इच्छा असेल तर मला ही पूजा करायला आवडेल.', असा विश्वास राष्ट्रवादी काँग्रेस शरद पवार गटाचे आमदार राजेश टोपे यांनी व्यक्त केला आहे. आज राजेश टोपे यांनी संत ज्ञानेश्वर महाराजांच्या पालखीमध्ये ठाकूर बुवाची समाधी ते तोंडले बोंडले असा पालखीबरोबर पायी प्रवास केला. यावेळी राजेश टोपे यांनी मृदुंग टाळ वाजवत वारकऱ्यांबरोबर फुगडी घातली. यावेळी साम टीव्हीशी बोलताना त्यांनी मुख्यमंत्रीपदाबाबत हे मोठं वक्तव्य केले.

राजेश टोपे यांनी पुढे सांगितले की, 'गेल्या पंचवीस वर्षांपासून माऊलींचे अखंडितपणे दर्शन घेत असतो. दरवर्षीपेक्षा तिप्पट वारकऱ्यांची गर्दी यंदा झाली आहे. वारीमध्ये राजकारण घुसवू नये. सरकारने वारकऱ्यांसोबत चर्चा करावी. वारकऱ्यांचं म्हणणं ऐकून घ्यावं.', असे मत त्यांनी व्यक्त केले. यावेळी विधान परिषद निकालावर बोलताना राजेश टोपे यांनी सांगितले की, 'महायुतीचा अनैतिकतेचा कारभार आहे. आमदारांची फोडाफोडी करून निवडणूक जिंकली गेली. लोकसभेत जनतेच्या मनातला भाव दिसून आला.'