आगामी विधानसभा निवडणुकीच्या तोंडावर शरद पवार यांनी भाजप आणि अजित पवार गटाला एकामागून एक धक्के देण्यास सुरुवात केली आहे. अलीकडेच भाजपचे पुणे प्रदेश पदाधिकारी सचिन फोलाने यांनी पक्षाची साथ सोडून राष्ट्रवादी शरद पवार गटात प्रवेश केला होता.

यानंतर आता शरद पवार यांनी भाजपोल आणखी एक धक्का दिला आहे. भाजपाचे माजी आमदार आणि आटपाडी खानापूरचे नेते राजेंद्र देशमुख यांचा भाजपाला रामराम ठोकला आहे.

राजेंद्र अण्णा देशमुख यांनी भाजप सोडत राष्ट्रवादी काँग्रेस शरद पवार गटात प्रवेश केल्याचं जाहीर केलं आहे. राजेंद्र अण्णा देशमुख यांनी शरद पवारांची सांगलीत भेट घेतली होती. या भेटीनंतर त्यांनी भाजप सोडत असल्याचं जाहीर केलं होतं.

भाजपाने आम्हाला शिवसेना शिंदे गटाला विकल्याचा आरोप करत त्यांनी पक्ष सोडला आहे. यातच राजेंद्र अण्णा देशमुख यांनी खानापूर आटपाडी विधानसभा मतदारसंघातून विधानसभा निवडणूक लढवण्यासाठी इच्छुक असल्याचं स्पष्ट केलं आहे.

अजित पवार गटालाही शरद पवार यांचा दणका

दरम्यान, शरद पवार गटाने अजित पवार यांनाही धक्का दिला आहे. सांगलीतील राष्ट्रवादी काँग्रेस अजित पवार गटाचे नेते शरद पवारांच्या भेटीला दाखल झाले आहेत. माजी आमदार सदाशिव पाटील आणि राष्ट्रवादी काँग्रेसचे अजित पवार गटाचे जिल्हाध्यक्ष वैभव पाटील शरद पवारांना भेटण्यासाठी पोहचले आहेत.

माजी आमदार सदाशिव पाटील आणि वैभव पाटील खानापूर-आटपाडी मतदारसंघाचे नेते आहेत. आगामी विधानसभा निवडणुकीच्या पार्श्वभूमीवर पाटील पिता-पुत्रांनी शरद पवार यांनी भेट घेतली आहे. यातच लवकरच सदाशिव पाटील आणि वैभव पाटील तुतारी फुंकतील, असं जवळजवळ स्पष्ट झालं आहे.