Summary -

• महाराष्ट्र सरकारने भंडारा ते गडचिरोली दरम्यान ९४ किमी लांबीच्या एक्स्प्रेस वेला मान्यता दिली आहे.

• या प्रकल्पासाठी एकूण ९३१.१५ कोटी रुपयांचा निधी मंजूर करण्यात आला आहे.

• या प्रवासाचे अंतर २३ किमीने कमी होऊन प्रवासाचा वेळ सव्वा तासावर येईल.

• विदर्भातील संपर्क सुविधा आणि आर्थिक विकासाला चालना मिळण्याची अपेक्षा आहे.

राज्यातील नागरिकांसाठी आनंदाची बातमी आहे. राज्यात आणखी एक एक्स्प्रेस वे तयार होणार आहे. भंडारा ते गडचिरोली ९४ किलोमीटरचा एक्स्प्रेस वे तयार केला जाणार आहे. फडणवीस सरकारने आजच्या मंत्रिमंडळ बैठकीमध्ये याबाबतची घोषणा केली. भुसंपादनासह अनुषंगिक ९३१ कोटी १५ लाख रुपयांच्या खर्चास मान्यता दिली आहे.

मिळालेल्या माहितीनुसार, भंडारा-गडचिरोली प्रवेश नियंत्रित एक्स्प्रेस वेच्या प्रकल्पाच्या सुधारित आखणीस आणि हा प्रकल्प महाराष्ट्र राज्य रस्ते विकास महामंडळामार्फत हाती घेण्यास आज झालेल्या मंत्रिमंडळ बैठकीत मान्यता देण्यात आली. मुख्यमंत्री देवेंद्र फडणवीस यांच्या अध्यक्षतेखाली झालेल्या बैठकीमध्ये हा निर्णय घेण्यात आला. या प्रकल्पामुळे भंडारा ते गडचिरोली प्रवासाचे अंतर २३ किलोमीटरने कमी होईल आणि प्रवासाचा कालावधी सव्वा तासावर येईल.

नागपूर- मुंबई दरम्यानचे प्रवास अंतर आणि कालावधी कमी करण्यासाठी हिंदू हृदयसम्राट बाळासाहेब ठाकरे महाराष्ट्र समृध्दी महामार्ग पूर्ण करण्यात आला आहे. विदर्भातील रस्ते वाहतुकीचे जाळे भक्कम करण्यासाठी भंडारा ते गडचिरोली प्रवेश नियंत्रित एक्स्प्रेस वेच्या अंतिम आखणीस २७ डिसेंबर २०२३ च्या शासन निर्णयानुसार मान्यता देण्यात आली आहे.

आता या महामार्गांतर्गत नागपूर -गोंदिया प्रवेश नियंत्रित शीघ्रसंचार एक्स्प्रेस वेच्या सावरखंडा इंटरचेंजपासून राज्य महामार्ग ५३ वरील कोकणागडपर्यंत प्रवेश नियंत्रित शीघ्रसंचार एक्स्प्रेस वे बांधणे आणि बोरगाव इंटरचेंज ते राज्य महामार्ग ३५३ ड वरील रणमोचनपर्यंत प्रवेश नियंत्रित शीघ्रसंचार द्रुतगती महामार्ग बांधणे अशा एकूण ९४.२४१ किलोमीटरच्या सुधारित आखणीस मान्यता देण्यात आली.

हा प्रोजेक्ट राज्य रस्ते विकास महामंडळामार्फत हाती घेण्यास आणि प्रोजेक्टसाठी भूसंपादनाची कार्यवाही करण्यासही मान्यता देण्यात आली. त्यासाठी तब्बल ५३४.४६ कोटी आणि व्याजापोटी ३९६.६९ कोटी असे एकूण ९३१.१५ कोटी रुपयांच्या तरतुदीस मान्यता देण्यात आली.