विधानसभा निवडणुकीच्या पार्श्वभूमीवर मुंबईत महाविकास आघाडीच्या पदाधाकि-यांचा संयुक्त मेळावा पार पडला. या मेळाव्यात सर्वाधिक लक्षवेधी भाषण ठरलं ते ठाकरे गटाचे खासदार संजय राऊतांचं. कारण संजय राऊतांनी शरद पवार आणि सुप्रिया सुळे यांच्यासमोरच अजितदादांवर जोरदार टीकेची झोड उठवलीय. अजितदादांच्या पिंक पॉलिटिक्सची खिल्ली उडवत संजय राऊतांनी थेट अजितदादांचा रंग बदलणारा सरडा असा उल्लेख केला आणि सभागृहात हशा पिकला.

राऊत एवढ्यावरच थांबले नाहीत तर त्यांनी महाराष्ट्रातील रंगाच्या राजकारणाचं सार सांगितलं. गुलाबी रंग महाराष्ट्राला धार्जिणा नाही असं म्हणत राऊतांनी अजित पवारांच्या पिंक पॉलिटीक्स नरेटीव्हलाच सुरुंग लावलाय. महाराष्ट्रात केवळ भगवा आणि तिरंगाच चालतो असा टोलाही त्यांनी लगावला.

राज्याचे उपमुख्यमंत्री अजित पवार यांनी पिंक रंगाचं जॅकेट घालायला सुरुवात केलीये. हा रंग शुभ असल्याचं अजितदादांना सांगितलं गेलंय. त्यामुळेच त्यांनी या रंगाचे जॅकेट रोज घालायला सुरुवात केल्याचं सांगितलं जातं. एवढंच नाही तर अजित पवार जिथं सभा घेतात तिथे गुलाबी मंडप आणि महिलाही गुलाबी फेटे घालून येतात...त्यावरच राऊतांनी प्रहार केल्यानं आता राज्यात रंगांचं राजकारण रंगण्याची शक्यता आहे.