नगरपरिषद आणि नगरपंचायतीच्या निवडणुकीच्या मतदानासाठी निवडणूक आयोगाची तयारी अंतिम टप्प्यात आली. येत्या २ डिसेंबर रोजी राज्यातील २४६ नगरपरिषदा आणि ४२ नगरपंचायतीच्या निवडणुकांसाठी मतदान होणार आहे. तर ३ डिसेंबरला मतमोजणी आहे. त्यामुळे उद्या म्हणजेच १ डिसेंबरपासून तीन दिवसांसाठी ड्राय डे असणार आहे. ड्राय डे असल्यामुळे मद्यप्रेमींना हे तीन दिवस मद्य खरेदी करता येणार नाही.

निवडणूक असलेल्या जिल्ह्यातील संबंधित नगरपरिषदा/नगरपंचायत निर्वाचन क्षेत्रातील सर्व देशी/ विदेशी किरकोळ मद्य विक्री व माडी विक्री अनुज्ञप्ती), बार अँड रेस्टॉरंट, वाईन शॉप, बिअर शॉपी १, २ डिसेंबर आणि ३ डिसेंबर २०२५ रोजी या तीन दिवशी बंद राहतील. या दिवशी मद्य विक्री बंदी करण्याचे आदेश देण्यात आलेत. तर काही जिल्ह्यात मतमोजणीच्या दिवशी (३ डिसेंबर) सर्व प्रक्रिया पूर्ण होईपर्यंत मद्यविक्री बंद राहिल. त्यानंतर मात्र काही जिल्ह्यांमध्ये मद्यविक्री सुरू होणार आहे. तर ज्या ठिकाणी निवडणुका रद्द झाल्या आहेत, त्या ठिकाणी मद्यविक्री चालू असणार आहे.

२ डिसेंबरला पगारी सुट्टी, महाराष्ट्र सरकारचा मोठा निर्णय

स्थानिक स्वराज्य संस्थांच्या निवडणुकांबाबत महाराष्ट्र सरकारने मोठा निर्णय घेतलाय. नगर परिषदा आणि नगर पंचायतींसाठी २ डिसेंबर रोजी मतदान होणार आहे. नागरिकांना मतदान करता यावे, मतदान प्रक्रियेत लोकांचा सहभाग वाढला पाहिजे, यासाठी सरकारने मोठा निर्णय घेतला. २ डिसेंबरला पगारी सुट्टी मिळणार आहे. या निवडणुकीसाठी राज्यातील विविध अस्थापने, व्यवसाय आणि कामाच्या ठिकाणी कार्यरत असलेल्या कर्मचाऱ्यांना पगारी सुट्टी सरकारने जाहीर केली आहे.

महाराष्ट्रातील स्थानिक स्वराज्य संस्थांच्या निवडणुका प्रदीर्घ काळापासून प्रलंबित होत्या. आता या निवडणुका होणार असून त्याचा पहिला टप्पा येत्या २ डिसेंबरला पार पडणार आहे. पहिल्या टप्प्यात महाराष्ट्रातील २४६ नगर परिषदा आणि ४२ नगर पंचायतींमध्ये निवडणुका होतील. त्यासाठी जोरदार तयारी सुरू आहे. शुक्रवारी जारी करण्यात आलेल्या शासकीय निर्णयानुसार महाराष्ट्र सरकारने २ डिसेंबर रोजी होणाऱ्या नगर परिषदा आणि नगर पंचायतींच्या निवडणुकांसाठी संबंधित जिल्ह्यातील कर्मचाऱ्यांसाठी पगारी सार्वजनिक सुट्टी जाहीर केली आहे.

ज्या जिल्ह्यांमध्ये २ डिसेंबर म्हणजे मंगळवारी मतदान होणार आहे. त्या जिल्ह्यांतील कर्मचारी, अधिकारी आणि कामगार या सर्वांना मतदानाचा हक्क बजावता यावा यासाठी पगारी सुट्टी देण्यात आली आहे. लोकप्रतिनिधी कायदा १९५१ मधील तरतुदीनुसार मतदानाच्या दिवशी मतदारांना पगारी सुट्टी देणं बंधनकारक आहे. ही सुट्टीची अट त्या सर्व कामगार, कर्मचारी आणि अधिकाऱ्यांसाठी लागू असते.

२ डिसेंबरला कुठे असेल मतदान

पालघर - डहाणू, जव्हार, पालघर, वाडा

रायगड - अलिबाग, कर्जत, खोपोली, महाड, माथेरान, मुरुड-जंजिरा, पणे, रोहा, श्रीवर्धन, उरण

रत्नागिरी - चिपळून, देवरुख , गुहागर, खेड, लांजा (नगर पंचायत), राजापूर, रत्नागिरी

सिंधुदुर्ग - कणकवली, मालवण, सावंतवाडी, वेंगुर्ला

ठाणे - अंबरनाथ, कुळगाव-बदलापूर

अहिल्यानगर - देवळाली प्रवरा, जामखेड, कोपरगाव, नेवासा, पाथर्डी, राहता, राहुरी

धुळे - दोंडाईचा-वरवाडे, पिंपळनेर, सिंदखेडा, शिरपूर-वरवाडे

जळगाव - जामनेर, अमळनेर, भडगाव, भुसावळ, चाळीसगाव, चोपडा, धरणगाव, एरंडोल, फैजपूर, मुक्ताईनगर, नशिराबाद, पाचोरा, पारोळा, रावेर, सावदा, शेंदूणी , वरणगाव, यावल

नंदूरबार - शहादा, नंदूरबार, नवापूर, तळोदा

नाशिक - भगूर, मनमाड, नांदगाव, सटाणा, सिन्नर, येवला, चांदगाव, इगतपुरी, ओझर

कोल्हापूर - आजरा, चंदगड, गडहिंग्लज, हातकणंगले, हुपरी, जयसिंगपूर, कागल, कुरुंदवाड, मलकापूर, मुरगूड, पन्हाळा, शिरोळ, वडगाव

पुणे - आळंदी, बारामती, भोर, चाकण, दौंड, फुरसुंगी-उरळी देवाची, इंदापूर, जेजुरी, जुन्नर, लोणावळा, मालेगाव बु , मंचर, राजगुरुनगर, सासवड, शिरुर, तळेगाव-दाभाडे, वडगाव

सांगली - आष्टा, आटपाडी , इस्लामपूर, जत, पळूस, शिराळा, तासगाव आणि विटा.

सातारा- कराड, मलकापूर, मेढा, म्हसवड, पाचगणी, फलटण, रहिमतपूर, सातारा आणि वाई.

सोलापूर- अक्कलकोट, अकलूज, अनगर , बार्शी, दुधनी, करमाळा, कुर्डूवाडी, मैदर्गी, मंगळवेढा, मोहोळ, पंढरपूर आणि सांगोला.

बीड- अंबेजोगाई, बीड, धारुर, गेवराई, माजलगाव आणि परळी- वैजनाथ.

छत्रपती संभाजीनगर- फुलब्री, गंगापूर, कन्नड, खुलताबाद, पैठण, सिल्लोड आणि वैजापूर.

धाराशिव- भूम, कळंब, मुरुम, नळदुर्ग, धाराशिव, परंडा, तुळजापूर आणि उमरगा.

हिंगोली- बसमतनगर, हिंगोली आणि कळमनुरी. जालना- अंबड, भोकरदन आणि परतूर.

लातूर- अहमदपूर, औसा, निलंगा, रेनापूर (न.पं.) आणि उदगीर.

नांदेड- बिलोली, देगलूर, धर्माबाद, हदगाव, हिमायतनगर (न.पं.), कंधार, कुंडलवाडी, मुदखेड, मुखेड, उमरी, भोकर, किनवट आणि लोहा.

परभणी- गंगाखेड, जिंतूर, मानवत, पाथरी, पूर्णा, सेलू आणि सोनपेठ.

अकोला- अकोट, बाळापूर, बार्शी- टाकळी, हिवरखेडा, मूर्तिजापूर आणि तेल्हारा.

अमरावती- अचलपूर, अंजनगाव सूर्जी, चांदूरबाजार, चांदूर रेल्वे, चिखलदरा, दर्यापूर, धामणगाव रेल्वे, धारणी (न.पं.), मोर्शी, नांदगाव खंडेश्वर (न.पं.), शेंदूरजनाघाट आणि वरुड.

बुलढाणा- बुलढाणा, चिखली, देऊळगाव राजा, जळगाव जामोद, खामगाव, लोणार, मलकापूर, मेहकर, नांदूरा, शेंगाव आणि सिंदखेडराजा.

वाशिम- कारंजा, मालेगाव (न.पं.), मंगरुळपीर, रिसोड आणि वशीम.

यवतमाळ- आर्णी, दारव्हा, दिग्रस, घाटंजी, पुसद, उमरखेड, वणी, यवतमाळ, ढाणकी (न.पं.), नेर- नबाबपूर आणि पांढरकवडा.

भंडारा- पवनी, साकोली शेंदूरवाफा, तुमसर आणि भंडारा.

चंद्रपूर- बल्लारपूर, भद्रावती, भिसी (न.पं.), ब्रह्मपूरी, चिमूर, गडचांदूर, घुग्घुस, मूल, नागभीड, राजूरा आणि वरोरा.

गडचिरोली- आरमोरी, देसाईगंज आणि गडचिरोली. गोंदिया- गोंदिया, गोरेगाव (न.पं.), सालेकसा (न.पं.) आणि तिरोडा.

नागपूर- बहादुरा (न.पं.), बेसा पिपळा (न.पं.), भिवापूर (न.पं.), बुटिबोरी, डिगडोह, कळमेश्वर- ब्रह्मणी, कामठी, कांद्री- कन्हान (न.पं.), काटोल, खापा, कोंढाळी (न.पं.), महादुला (न.पं.), मोहपा, मौदा (न.पं.), नरखेड, निलडोह (न.पं.), पारशिवणी (न.पं.), रामटेक, सावनेर, उमरेड, वानाडोंगरी, बिडगाव- तरोडी (खू) पांढुर्णा (न.पं.), गोधणी रेल्वे (न.पं.), कन्हान- पिपरी, मोवाड, वाडी आणि येरखेडा (न.पं.).