संदीप भोसले, साम टीव्ही

आई आणि लेकाच्या नात्याला काळिमा फासणारी घटना समोर आली आहे. वडिलोपार्जित शेतीवरून नराधमानं आपल्याच जन्मदात्या आईवर धारदार शस्त्राने वार करत त्यांची हत्या केली आहे. ही धक्कादायक घटना लातूरच्या अहमदपूर तालुक्यातीव महादेववाडीत घडली आहे.

जन्मदात्या आईची हत्या केल्यानंतर पुरावे नष्ट करण्यासाठी आरोपीनं मृतदेह घरातीलच पाण्याच्या हौदात फेकला. मात्र, गुन्हा उघडकीस आल्यानंतर पोलिसांनी आरोपी मुलाला ताब्यात घेतलंय.

लातूरच्या अहमदपूर तालुक्यातील महादेववाडी एक संतापजनक घटना घडली आहे. रागाच्या भरात जन्मदात्या आईवर मुलाने डोक्यात धारदार शस्त्राने वार करत त्यांनी हत्या केली आहे. विक्रम चामे (वय वर्ष ३५) असे नराधम मुलाचे नाव आहे. तर, वनिता प्रकाश चामे (वय वर्ष ५५) असे मृत महिलेचे नाव आहे.

वडिलोपार्जित शेती नावावर करून देत नसल्यामुळे त्याने आईची हत्या करायचं ठरवलं. आई गाढ झोपेत होती. त्याने हीच संधी साधत आईच्या डोक्यात धारदार कुराडीने वार केले. वार इतके जोरात बसले की, यात जन्मदात्या आईचा जागीच तडफडून मृत्यू झाला. आईची हत्या केल्यानंतर पुरावे नष्ट करण्यासाठी हौदाचा वापर केला.

आरोपी मुलाने मृतदेह घरातीलच पाण्याच्या हौदात फेकला. या घटनेची माहिती पोलिसांना मिळाल्यानंतर त्यांनी घटनास्थळी धाव घेतली. त्यांनी चौकशी केली असता, आरोपी मुलाने जन्मदात्या आईचा खून केला असल्याची माहिती समोर आली आहे. त्यानंतर अहमदपूर पोलिस ठाण्यात गुन्हा दाखल केला आहे. तसेच पोलीस अधिक तपास करीत आहेत.