संदीप भोसले 
लातूर : लातूर जिल्ह्यातील उदगीर येथे बॉयलर कोंबड्यांमध्ये बर्ड फ्लूची लागण झाल्याचे समोर आले आहे. दरम्यान उदगीरमध्ये बर्ड फ्लूचा धोका अधिक वाढत असून याठिकाणी शेकडो कोंबड्यांचा मृत्यू झाला आहे. या मृत कोंबड्यांची विल्हेवाट लावण्यात आली आहे. यामुळे प्रशासन सतर्क झाले असून, आवश्यक प्रतिबंधात्मक उपाययोजना राबविण्यात येत आहेत.

राज्यात बर्ड फ्लूचा धोका अधिक प्रमाणात वाढत आहे. नांदेड, रायगड यासोबतच लातूर जिल्ह्यात देखील बर्ड फ्लूची मोठ्या प्रमाणात लागण झाल्याचे पाहण्यास मिळत आहे. यात लातूरच्या उदगीरमध्ये कोंबड्यांच्या पिल्लांचा मृत्यू झाला होता. यामुळे काही पोल्ट्री फार्ममधील कोंबड्यांचे नमुने तपासणीसाठी भोपाल येथील प्रयोगशाळेत पाठवण्यात आले असता अहवालानुसार या नमुन्यांचे रिपोर्ट पॉझिटिव्ह आल्याचे स्पष्ट झाले आहे.

कोंबड्यांची लावण्यात आली विल्हेवाट 

उदगीरमधील रामनगर भागात कोंबड्यांना बर्ड फ्लूची लागण झाल्याची धक्कादायक माहिती समोर आली आहे. भोपाल येथे पाठविण्यात आलेल्या पशुवैद्यकीय प्रयोग शाळेतील कोंबड्यांच्या नमुन्यांचे अहवाल आता पॉझिटिव्ह आले आहेत. त्यामुळे प्रशासन देखील अलर्ट मोडवर आले आहे. दरम्यान या परिसरातील एक किलोमीटर परिसरातील कोंबड्यांचे शास्त्रोक्त पद्धतीने विल्हेवाट देखील लावले गेली आहेत. 

१० किमीपर्यंत अलर्ट झोन 

दरम्यान उदगीरमध्ये बर्ड फ्लूचा धोका वाढत असल्याने प्रशासन अलर्ट मोडवर आले आहे. खबरदारी म्हणून १० किलोमीटर पर्यंतचा परिसर अलर्ट झोन म्हणून घोषित करण्यात आला आहे. दरम्यान बर्ड फ्लूचा वाढता धोका लक्षात घेता पोल्ट्रीफार्म चालकांनी सावधानी बाळगावी. तसेच नागरिकांनी कुठल्याही अफवांवर विश्वास न ठेवता प्रशासनाला सहकार्य करण्याचे आवाहन देखील प्रशासनाने केले आहे.