>>संदीप भोसले, साम टीव्ही

Latur Latest News : लातूरमध्ये 11 वर्षीय लहान मुलीचा खिडकीतून तोल जाऊन खाली पडल्याने मृत्यू झाल्याची घटना घडली आहे. हॉटेलच्या दुसऱ्या मजल्यावरून मुलगी विजेच्या तारेवर पडली आणि यातच तीचा मृत्यू झाला. या दुर्दैवी घटनेमुळे परिसरात हळहळ व्यक्त होतं आहे.

आद्या देशपांडे असे या मुलीचं नाव आहे. ती मुळची हैदराबाद येथील रहिवाशी आहे. लातूरमध्ये ती एका कार्यक्रमासाठी तिच्या मावशीसोबत आली होती. हा कार्यक्रम आटोपल्यानंतर मावशी आणी ती दोघी बुकिंग असलेल्या हॉटेलवर येऊन आराम करत होत्या. मात्र आद्या हॉटेलच्या खिडकीत बसून शेजारच्या जिल्हा परिषद मैदानावर सुरू असलेली व्हॉलीबॉल मॅच पाहत बसली होती.

दरम्यान अचानक खिडकी उघडली आणि आद्याचा तोल गेला. आद्या ही दुसऱ्या मजल्यावरून खाली पडली. खिडकीच्या खालीच विजेची तार आहे. आद्या खिडकीतून पडली तेव्हा ती आधी या विजेच्या तारेवर पडली आणि नंतर जमिनीवर आदळली. (Breaking News)

या घटनेची माहिती मिळताच शिवाजीनगर पोलीस ठाण्यातील पोलीस कर्मचाऱ्यांनी घटनास्थळावर धाव घेतली. आद्याला उपचारासाठी खाजगी दवाखान्यात दाखल करण्यात आलं. मात्र तिची परिस्थिती गंभीर असल्याने तेथील डॉक्टरांनी तिला लातूरच्या वैद्यकीय महाविद्यालयात नेण्याचा सल्ला दिला. मात्र या घटनेत आद्याचा मृत्यू झाला. (Latest Marathi News)