संदीप भोसले, लातूर

लातूर -नांदेड महामार्गावर काही दिवसांपूर्वी झालेल्या भीषण अपघाताचा थरारक व्हिडीओ समोर आला आहे. या भीषण अपघातामध्ये एकाचा जागीच मृत्यू तर एक महिला गंभीर जखमी झाली होती. लातूर-नांदेड महामार्गावरच्या नांदगाव पाटी येथे ३ दिवसांपूर्वी झालेल्या अपघाताचा थरारक सीसीटीव्ही व्हिडीओ समोर आला आहे. दुचाकीवरून जाणाऱ्या पती-पत्नीला कारची जोरदार धडक दिली. यापूर्वी याच ठिकाणी दोन भीषण अपघात झाले होते. यामध्ये एकाचा मृत्यू तर चार जणांना कायमचे अपंगतत्व आले होते.

लातूर -नांदेड महामार्गावरच्या नांदगाव पाटी येथे अपघाताचे सत्र सुरूच आहे. हा महामार्ग मृत्यूचा चौफुला होत चालला आहे. दुचाकी आणि कारचा भीषण अपघातामध्ये एकाचा जागीच मृत्यू झाला. ८ दिवसांपूर्वीच याच ठिकाणी बस उलटून भीषण अपघात झाला होता. त्यानंतर पुन्हा याच ठिकाणी दुचाकी आणि कारचा भीषण अपघात झाला. अपघात इकता भीषण होता की दुचाकीवरील दोघेही जण उंच उडून रस्त्यावर पडले. या अपघातामध्ये दुचाकीवरील एकाचा जागीच मृत्यू झाला.

आतापर्यंत याच ठिकाणी तीन मोठे अपघात झाले असून या अपघातात ३ जणांच्या मृत्यूची नोंद झाली आहे. दुचाकी वरील जखमी व्यक्तीला लातूरच्या शासकीय रुग्णालयात उपचार सुरू आहेत. तर एका जखमीची प्रकृती चिंताजनक असल्याची माहिती मिळत आहे. मागच्या एक महिन्यापूर्वीच याच ठिकाणी एका पशुवैद्यकीय अधिकाऱ्याचा दुचाकीवरून जात असताना अपघात झाला होता. या अपघातात या डॉक्टरांचा जागीच मृत्यू झाला होता.

त्यानंतर काही दिवसांपूर्वी याच ठिकाणी भरधाव वेगात येणाऱ्या एसटी बससमोर दुचाकीस्वार आल्याने बस उलटली. या अपघातात बसमधील ३६ प्रवासी गंभीर जखमी झाले होते. यामधील तीन प्रवाशांना कायमचं अपंगत्व आले. त्यामुळे जिल्हातून जाणाऱ्या महामार्गावरील सतत अपघात होणारे ब्लॅक स्पोट शोधून प्रशासनाने सुरक्षेच्या दृष्टीने उपाययोजना कराव्या, अशी मागणी माजी आमदार धीरज देशमुख यांनी केली आहे.