Crime News: लालबाग येथे एका २३ वर्षीय मुलीने आपल्या आईची क्रूरपणे हत्या केली. आईच्या मृतदेहाचे तिने तुकडे केले होते. मृतदेहाचा कुजलेला वास येऊ नये यासाठी तिने वेगवेगळे उपाय केले. मात्र तिचं हे भांड पोलिसांनी उघडं पाडलं आहे. आता या प्रकरणी वेगवेगळ्या अपडेट समोर येत आहेत. (Crime News)

पोलिसांनी दिलेल्या माहितीनुसार, आईचा मृतदेह ताब्यात घेण्यात आला आहे. मृत्यूचं खरं कारण काय यासाठी पोलीस पोस्टमार्टम रिपोर्टची वाट पाहत आहेत. त्यातच मुलीची देखील कसून चौकशी सुरू आहे. तिने एवढं टोकाचं पाऊल का उचललं याचं उत्तर शोधत असताना पोलिसांच्या हाती एक वेगळी माहिती लागली आहे.

२३ वर्षीय तरुणीची चौकशी सुरू असताना तपासात समजले आहे की, तरुणी गेल्या अनेक दिवसांपासून टीव्हीवर क्राईम व्हिडिओ आणि सिरिअल पाहत होती. तिने क्राईम पेट्रोलचे सर्व एपीसोड पाहिलेत. या सर्वांमधूनच मी आईच्या मृतदेहाचे तुकडे करण्याचा निर्णय घेतला असं, या तरुणीने पोलिसांना सांगितलं आहे.

पोलिसांनी या प्रकरणी आणखीन एका तरुणाला अटक केली आहे. उत्तर प्रदेश येथून या युवकाला चौकशीसाठी मुंबईला आणण्यात आले आहे. हा तरुण गेल्या अनेक दिवसांपासून लालबाग परिसरात सॅन्डवीच विकत होता. त्याची आणि आरोपी २३ वर्षीय मुलगी रिंकल जैन या दोघांची मैत्री असल्याचं पोलिसांच म्हणणं आहे.