लाडक्या बहिणींना एप्रिल महिन्याचा १५०० रुपयांचा दहावा हफ्ता बँक खात्यात जमा झाला आहे. मात्र महायुती सरकारच्या आश्वासनानुसार वाढीव २१०० रुपयांचा हफ्ता कधी मिळणार ? याची प्रतिक्षा कायम आहे. या पार्श्वभूमिवर शिंदे सेनेच्या मंत्र्यांच्या विधानानं लाडक्या बहिणींचं टेन्शन वाढलं आहे. राज्याची आर्थिक स्थिती पाहता लाडकीला 2100 रुपये मिळणार नाहीत, अशी वस्तूस्थिती सामाजिक न्याय मंत्री संजय शिरसाट यांनी मांडली आहे.

मात्र 1500 रुपयांचा हप्ता सुरूच राहणार असल्याचं त्यांनी स्पष्ट केलंय राज्याच्या उत्पन्नाच्या सुमारे १० टक्के निधी केवळ लाडकी बहिण योजनेवर खर्च होतोय. त्यामुळे इतर विभागांच्या विकास कामांवर परीणाम होतोय. मंत्री संजय शिरसाट यांनीही सामाजिक खात्याचा ४०० कोटींचा निधी लाडकीकडे वळवल्यानं नाराजी व्यक्त केली आहे. या योजनेमुळे निधी मिळत नसल्यानं महायुतीत धुसफूस सुरु आहे.

सन 2025-26 मध्ये या योजनेकरीता एकूण 36 हजार कोटी रुपयांची तरतूद केलेली असली तरी अर्थसंकल्पातही २१०० रुपयांची घोषणा केलेली नाही. सरकारची तिजोरी रिकामी असल्यानं लाडकीला वाढीव हप्ता देणे शक्य नाही. मात्र हेच वास्तव आता खुद्द मंत्रीच बोलून दाखवतायेत. त्यामुळे काटेकोर पडताळणीतून लाडकीची संख्या आणखी घटणार आणि १५०० रुपयांवरच लाडकीला समाधान मानावं लागणार आहे. एव्हढं मात्र निश्चित.