चेतन व्यास, साम प्रतिनिधी

कारच्या मालकीण असणाऱ्या लाडक्या बहिणींनी सुद्धा लाडकी बहीण योजनेचा लाभ घेतल्याची बाब वर्ध्यात समोर आलीय. जिल्ह्यातील लाडकी बहीण योजनेच्या लाभार्थ्यांच्या अर्जांची पडताळणी केली जात आहे. त्यानुसार, जिल्ह्यातील ३२०० महिलांना अपात्र होणार आहेत. महायुती सरकारची लोकप्रिय लाडकी बहीण योजनेचे निकष कडक करण्यात आले आहेत. ज्या महिला या योजनेच्या पात्रतेत बसणार नाहीत, त्यांना अपात्र केलं जाणार आहे.

लाडकी बहीण योजनेचा लाभ घेणाऱ्या महिलांकडे जर चारचाकी वाहन असेल तर त्यांना या योजनेतून अपात्र केलं जाणार आहे. राज्यभरातील लाखो लाडक्या बहिणींच्या अर्जांची आता पडताळणी केली जात आहे. त्यातून वर्धा जिल्ह्यातील ३२०० महिला अपात्र होणार आहेत. विधानसभा निवडणुकीपूर्वी राज्य सरकारने लाडकी बहीण योजना सुरू केली होती. या योजनेच्या माध्यमातून राज्यातील महिलांच्या खात्यात थेट १५०० रुपये टाकण्यात आले.

आता या योजनेचे नवीन नियम आणण्यात आले आहेत. आता ज्यांच्या घरात चारचाकी वाहन आहे, त्या महिलांना या योजनेचा लाभ घेता येणार नाहीये. ज्या महिलांचा नावावर चार चाकी वाहन आहे, अशा महिलांची यादी परिवहन विभागाने महिला व बाल कल्याण विभागाला पाठवली आहे. यामुळे या ३२०० लाडक्या बहिणींवर अपात्रतेची टांगती तलवार आहे. दुसरीकडे पात्र ठरलेल्या १८ लाडक्या बहिणींनी संबंधित योजनेचा लाभ नको, असा रीतसर अर्ज दाखल केला आहे.

राज्य सरकारने विधानसभा निवडणुकीपूर्वी अर्ज करणाऱ्या सर्व लाडक्या बहिणींना योजनेचा लाभ देत त्यांच्या खात्यात दरमहा १५०० रुपये जमा करायला सुरुवात केली आहे. पण निवडणुका झाल्यानंतर सरकारने या योजनेसाठी नवीन नियम आणि अटी लागू केल्या आहेत. यामुळे अनेक लाडक्या बहिणींना योजनेत अपात्र होण्याच्या शक्यतेमुळे लाडक्या बहिणींची धडधड वाढली आहे.

नवीन नियम लागू झाल्यानंतर जिल्ह्यातील १८ महिलांनी महिला आणि बाल विकास विभागाला योजनेचा लाभ न घेण्यासाठी पत्र लिहिले आहे. परिवहन विभाग (आरटीओ) ने वर्धा जिल्ह्यातील त्या महिलांची यादी तयार केली आहे ज्यांच्या कडे कार आहे. त्याच आधारावर लवकरच सर्वेक्षण सुरू केले जाईल. योजनेसाठी पात्र लाभार्थ्यांसाठी अनेक नियम आहेत. त्यातले एक मुख्य नियम असे आहे की, जर महिलांच्या नावावर कार किंवा ट्रॅक्टर असेल, तर ती महिला योजनेचा लाभ घेऊ शकत नाहीय. यामुळे आता या लाडक्या बहिणींची धडधड वाढली आहे. पात्र लाडक्या बहिणींची फेरतपासणी संबंधित विभागाकडून केली जाणार आहे. यात आता किती लाडक्या बहिणी अपात्र होतात हे पाहावं लागणार आहे.