अमर घटारे

Amravati:

अमरावतीमधील सिटी लँड परीक्षा सेंटवर मोठा गोंधळ झाला आहे. एका विद्यार्थीनीला परीक्षेला बसू न दिल्याने तिची प्रकृती अचानक बिघडलीये. परीक्षेला पोहचण्यास तिला उशिर झाला त्यामुळे तिला बाहेर उभं करण्यात आलं. या गोष्टीमुळे तिला फार वाईट वाटले आणि तिला थेट चक्कर आली. यामुळे परीक्षाकेंद्रावर काहीवेळ गोंधळ निर्माण झाला.

मिळालेल्या अधिक माहितीनुसार, आज कृषी सेवक या पदाची अमरावतीच्या सिटी लँडमधील एका सेंटरवर ऑनलाईन परीक्षा होत आहे. या परीक्षेसाठी चंदना रामकृष्ण वाहुरवाघ ही विद्यार्थिनी परीक्षा सुरू होण्याच्या अर्धा तास आधी पोहोचली. मात्र रिपोर्टिंग टाईमनंतर फक्त तिला 2 मिनिटे उशिर झाला त्यामुळे तिला परीक्षेला बसू दिले नाही.

यामुळे या विद्यार्थिनीची प्रकृती अचानक बिघडली व चक्कर येऊन ती खाली पडली. मात्र कृषी विभागाच्या अधिकारी व कर्मचाऱ्यांनी या विद्यार्थिनीला दवाखान्यात नेण्याचे सौजन्य देखील दाखवले नाही. एकतर सिटीलँड हे सेंटर अमरावती शहरापासून दहा किलोमीटर दूरवर आहे.

या ठिकाणी जाण्यासाठी विद्यार्थ्यांना सिटी बस किंवा इतर वाहने देखील उपलब्ध नसतात. अशावेळी विद्यार्थ्यांची अडचण समजून घेण्याऐवजी त्यांना परीक्षेपासून वंचित ठेवत असल्याने विद्यार्थ्यांचा या परीक्षेत येणाऱ्या आयबीपीएस एजन्सी विषयी संताप व्यक्त होत आहे.