नवीन वर्ष सुरु होण्यासाठी अवघे काही दिवस उरले आहेत. नवीन वर्षाच्या स्वागतासाठी अनेकजण बाहेर फिरायला जाण्याचा प्लान करतात. मित्रमैत्रिणींसोबत पार्टीचा प्लान करतात. जर तुम्ही नवीन वर्षाच्या स्वागतासाठी कोल्हापूरच्या दाजीपूर अभयारण्याचा भेट देण्याचा विचार करत असाल तर हे अभयारण्य दोन दिवस बंद असणार आहे.

कोल्हापूर जिल्ह्यातील गव्यासाठी प्रसिद्ध असलेले दाजीपूर अभयारण्य ३१ डिसेंबर ते १ जानेवारी या कालावधीत बंद असणार आहे. दोन दिवसांसाठी पर्यटक आणि अभ्यासकांना दाजीपूर अभयारण्यात प्रवेश बंद राहणार आहे.

राधानगरी तालुक्यातील हे दाजीपूर अभयारण्य गवरेडा आणि इतर प्राण्यांसाठी प्रसिद्ध आहे. दरवर्षी महाराष्ट्रातून हजारो पर्यटक येथे येत असतात. नवीन वर्षाच्या पार्श्वभूमीवर काही अनुचित प्रकार घडू नये म्हणून वन्यजीव विभागाने दोन दिवसासाठी अभ्यारण्य बंद ठेवण्याचा निर्णय घेतला आहे.

या काळात अभयारण्य क्षेत्रात विनापरवाना प्रवेश, मद्य पिणे, गाणी वाजवणे, प्लास्टिक कचरा करणे किंवा हुल्लडबाजी करणाऱ्या पर्यटकांवर वन्यजीव कायद्याअंतर्गत कारवाई करण्यात येणार आहे. ३१ डिसेंबर ते १ जानेवारी या काळात पर्यटकांनी येऊ नये, असे आवाहन वन्यजीव विभागाकडून करण्यात आले आहे. त्यामुळे जर नववर्षाच्या स्वागतासाठी तुम्ही कोल्हापूरला जाण्याचा प्लान करत असाल तर वेळीच थांबा

नवीन वर्षाच्या स्वागतासाठी अनेकजण फिरायला जातात. नवीन वर्षाचे स्वागत करण्यासाठी गोवा, लोणावळा अशा ठिकाणी तरुणाई जाते. परंतु नवीन वर्षाच्या पार्श्वभूमीवर काही अनुचित प्रकार घडू नये, म्हणून अनेक ठिकाणी पर्टकांना बंदी घालण्यात आली आहे. त्यामुळे कुठेही फिरायला जाण्याआधी ती जागा पर्यटकांसाठी खुली आहे की नाही हे एकदा चेक करा.