गेल्या काही दिवसांपासून उपमुख्यमंत्री एकनाथ शिंदेंनी कोल्हापूरवर लक्ष केंद्रीत केलं आहे. शिंदे गटाच्या शिवसेनेने अनेक मोठ्या नेत्यांना गळाला लावलंय. एकनाथ शिंदे यांनी कोल्हापुरात एकाच वेळी काँग्रेसचे सतेज पाटील, भाजप आणि ताराराणी आघाडीला धक्का दिला. तीनही गटातील दोन माजी महापौर आणि 20 नगरसेवकांनी शिंदेंच्या शिवसेनेत प्रवेश केलाय.

एकनाथ शिंदेंनी आधी काँग्रेसचे नेते सतेज पाटील यांचे कट्टर समर्थन शारंगधर देशमुख यांना फोडलं. त्यानंतर आता महापालिकेच्या निवडणुकांआधी एकनाथ शिंदेंनी परत एकदा कोल्हापूरवर लक्ष केंद्रीत करत तेथील भाजप- काँग्रेस आणि ताराराणी आघाडीला धक्का दिला. येथील जवळपास २० नगरसेवकांनी शिवसेनेत प्रवेश केलाय. काँग्रेसचे प्रमुख मोहरे फोडल्याने हा सतेज पाटील यांना धक्का मानला जात आहे.

कोल्हापुरातील सतेज पाटील यांचे वर्चस्व मोडून काढण्यासाठी एकनाथ शिंदेंनी कंबर कसलीय. शिंदेंच्या शिवसेनेची जबाबदारी आमदार राजेश क्षीरसागर आणि जिल्हा समन्वयक सत्यजित कदम यांच्यावर आहे. सत्यजित कदम यांच्या पुढाकाराने भाजप आणि ताराराणी आघाडीतील काही नगरसेवकांनी शिंदेंच्या शिवसेनेत प्रवेश केला. महापालिका निवडणुकीसाठी भाजपकडे कोणताही प्रमुख चेहरा नाहीये, त्यामुळे नगरसेवकांनी शिंदेंच्या शिवसेनेत प्रवेश केला असल्याची चर्चा आहे.

या नेत्यांनी शिवसेनेत केला प्रवेश

माजी महापौर निलोफर आजरेकर, माजी महापौर प्रतिभा नाईकनवरे, उपमहापौर दिंगबर फराकटे, प्रकाश नाईकनवरे, अभिजित चव्हाण, रीना कांबळे, तात्या खेडकर आणि त्यांच्या पत्नी, गीता गुरव, अश्विनी बारामते, सचिन मोहिते(सुनंदा मोहिते), संभाजी जाधव, संगीता संजय सावंत, पूजा नाईकनवरे, रेखा पाटील, जहांगीर पंडत, भरत लोखंडे या नेत्यांनी शिवसेनेत प्रवेश केला.

जालन्यात ठाकरे गटाला मोठा धक्का

उद्धव ठाकरेंनी लोकसभा निवडणुकीला दिलेला शब्द पाळला नाही म्हणून जालन्यातील एका ठाकरे गटाच्या शिलेदाराने पक्षाला रामराम ठोकलाय. ठाकरे गटाचे राज्य सचिव डॉ. संजय लाखे पाटील यांनी पक्ष सदस्याचा राजीनामा दिलाय. लोकसभेचे तिकीट देतो म्हणून उद्धव ठाकरेंनी शब्द दिला होता पण तो त्यांनी पाळला नाही, असं म्हणत डॉ. संजय लाखे यांनी राजीनामा दिला.