रणजित माजगावकर

कोल्हापूर : कोल्हापुरातील तवणाप्पा पाटणे हायस्कूल समोर खेळत असणाऱ्या विद्यार्थ्यांवर माकडाच्या कळपाने अचानक हल्ला केला. या हल्ल्यात एक विद्यार्थी जखमी झाला आहे. हा संपूर्ण प्रकार सीसीटीव्हीत कैद झालेला आहे. हि घटना शनिवारी दुपारच्या सुमारास घडली असून जखमी विद्यार्थ्याला रुग्णालयात दाखल करण्यात आले आहे. 

कोल्हापुरातील (Kolhapur) राजारामपुरी दहाव्या गल्लीत असलेल्या पाटणे हायस्कूल समोर काही मुलं शनिवारी दुपारी खेळत होते. यावेळी खेळात असलेल्या मुलांवर शाळेच्या परिसरातील झाडावर बसलेल्या माकडांच्या कळपाने अचानकपणे धाव घेत हल्ला केला. यावेळी शौर्य भोसले हा विद्यार्थी पळून बाजूला जात असताना माकडाने पाठीमागून त्याच्या अंगावर उडी (Monkey Attack) मारली. यामुळे शौर्य जोरात रस्त्यावर आढळल्याने त्याच्या डोक्याला दुखापत झाली. नागरिकांनी या माकडांना हुसकवून शौर्याची सुटका केली. 

सीसीटीव्हीत घटना कैद 

तीन- चार मुले खेळत असताना त्यांच्या मागे माकडाने पाठलाग करत एकावर हल्ला केला. माकडाच्या हल्ल्यात शौर्य जखमी झाला असून त्याला उपचारासाठी रुग्णालयात दाखल करण्यात आले आहे. हा संपूर्ण प्रकार या परिसरातील सीसीटीव्हीमध्ये कैद झालेला आहे. या परिसरात माकडाच्या कळपाची चांगलीच दहशत बसलेली आहे.