Rajesh Kshirsagar bribery allegations : एकनाथ शिंदेंच्या शिवसेनेचे आमदार राजेश क्षीरसागर यांच्यावर भ्रष्टाचार आणि लाचखोरीचे गंभीर आरोप करण्यात आले आहेत. शिवसेना ठाकरे गटाचे कोल्हापूर जिल्हाप्रमुख रविकिरण इंगवले यांनी हा गंभीर आरोप केला आहे. एका व्यावसायिकाकडून तब्बल ४० लाख रुपयांची मागणी करण्यात आल्याचा दावा रविकिरण इंगवले यांनी केला. यासंदर्भातील पैशांच्या कथित देवाणघेवाणीच्या संभाषणाचा व्हिडिओ पत्रकार परिषदेत प्रसारित करत या प्रकरणाची सखोल चौकशी करण्याची मागणीही इंगवले यांनी केली. दरम्यान, या आरोपांवर आमदार राजेश क्षीरसागर यांनी इंगवले हे ब्लॅकमेलर असल्याची प्रतिक्रिया दिली आहे.

रविकिरण इंगवले यांनी पत्रकार परिषदेत आमदार राजेश क्षीरसागर यांच्यावर गंभीर आरोप करत, एका व्यावसायिकाकडून ४० लाख रुपयांची मागणी करण्यात आल्याचा दावा केला. या व्यवहारासंदर्भातील कथित संभाषणाचा व्हिडिओ त्यांनी पत्रकारांसमोर सादर केला. या प्रकरणाची निष्पक्ष चौकशी करून संबंधितांवर कारवाई करावी, अशी मागणी त्यांनी केली. या प्रकरणाचा व्हिडिओ सोशल मीडियावर व्हायरल झाला आहे.

आमदार राजेश क्षीरसागर यांचा व्हिडिओ व्हायरल करण्यामध्ये काँग्रेस नेते सतेज पाटील यांचा हात आहे. कोल्हापूर महानगरपालिका निवडणुकीच्या शेवटच्या दिवशी हाच व्हिडिओ त्यांनी प्रसिद्ध केला होता. याबाबत त्यांनी मुख्यमंत्री आणि उपमुख्यमंत्री यांच्याकडे चौकशीची मागणी केली होती. मुळात रविकिरण इंगवले हा ब्लॅकमेलर आहे, असे पत्र आमदार राजेश क्षीरसागर यांचे चिरंजीव नगरसेवक ऋतुराज क्षीरसागर यांनी प्रसिद्ध केले आहे.

कोल्हापूर शिवसेना ठाकरे गटाचे नेते संजय पवार आणि विजय देवणे यांनी या प्रकरणात मुख्यमंत्री देवेंद्र फडणवीस यांना पत्र लिहिले आहे. आमदार राजेश क्षीरसागर यांच्या व्हिडिओची SIT नेमून चौकशी करावी, त्याचबरोबर क्षीरसागर यांची आमदारकी रद्द करावी आणि त्यांना अटक करण्यात यावी, अशी मागणी पत्राद्वारे करण्यात आली आहे. व्हिडिओ क्लिपमध्ये नाव आलेल्या राहुल आणि प्रशांत यांचा शोध घेऊन त्यांना देखील अटक करावी, असेही पत्रात म्हटले आहे.