कोल्हापूर जिल्ह्यात राज्य उत्पादन शुल्क विभागाने मोठी कारवाई करत गोवा बनावट विदेशी दारूचा तब्बल १ कोटी ३० लाख ५० हजार रुपयांचा साठा वाहनासह जप्त केला आहे. जिल्हा परिषद आणि पंचायत समिती निवडणुकांच्या पार्श्वभूमीवर ही कारवाई करण्यात आली आहे.

राज्य उत्पादन शुल्क विभागाला मिळालेल्या खात्रीशीर माहितीच्या आधारे भरारी पथक क्रमांक १ ने शाहुवाडी तालुक्यातील अणुस्कुरा फाटा, राजापूर–मलकापूर रोडवर पहाटे साडेपाचच्या सुमारास संशयित अशोक लेलँड ६ चाकी ट्रक थांबवून तपासणी केली. या ट्रकमधील कंटेनरमध्ये गोवा राज्य निर्मित आणि महाराष्ट्रात विक्रीस बंदी असलेली रॉयल ब्ल्यू माल्ट व्हिस्कीचे १,६०० बॉक्स, म्हणजेच ७६,८०० सिलबंद बाटल्या आढळून आल्या.

एकूण मद्यसाठा १३,८२४ बल्क लिटर इतका आहे. या कारवाईत दारू साठा, ट्रक आणि मोबाईल असा एकूण १ कोटी ३० लाख ५० हजार रुपयांचा मुद्देमाल जप्त करण्यात आला आहे. या प्रकरणी राजस्थानच्या ट्रक चालक रामजीवन विरधाराम बिश्नोई याला अटक करण्यात आली असून त्याच्याविरोधात महाराष्ट्र दारूबंदी कायद्यानुसार गुन्हा दाखल करण्यात आला आहे. दरम्यान, या गुन्ह्याचा पुढील तपास राज्य उत्पादन शुल्क विभागाकडून सुरू आहे.