रणजित माजगावकर, कोल्हापूर

कोल्हापूर जिल्ह्यातील शिरोळ तालुक्यातील तेरवाड येथे भरधाव डंपरने तीन दुचाकींना मागून जोरदार धडक दिल्याने भीषण अपघात झाला. या दुर्घटनेत ४ जणांचा मृत्यू झाला असून, ४ जण गंभीर जखमी झाले आहेत. जखमींना रुग्णालयात उपचारासाठी दाखल करण्यात आले आहे. याप्रकरणी पोलीस पुढील तपास करत असून घटनेमुळे परिसरात हळहळ व्यक्त केली जात आहे.

मिळालेल्या माहितीनुसार, हेरवाडहून कुरुंदवाडच्या दिशेने भरधाव वेगाने जाणाऱ्या डंपरने तेरवाड येथील रसवंती गृहाजवळ पुढे जाणाऱ्या तीन दुचाकींना मागून जोरदार धडक दिली. धडक इतकी भीषण होती की, या अपघातात चौघांना आपला जीव गमवावा लागला, तर चार जण गंभीर जखमी झाले.

मृतांमध्ये अब्दुललाट येथील एक महिला आणि एका पुरुषासह अर्जुनवाड येथील दोन तरुणांचा समावेश असल्याची माहिती आहे. अपघातात जखमी झालेल्यांना स्थानिक नागरिकांनी तातडीने रुग्णालयात दाखल केले.

दरम्यान, दुचाकींना धडक दिल्यानंतर डंपर बॅरिकेडला धडकून रस्त्यालगतच्या शेतात जाऊन थांबला. मात्र, अपघातानंतर डंपर चालक वाहन घटनास्थळीच सोडून पसार झाला. घटनेची माहिती मिळताच पोलिसांनी घटनास्थळी धाव घेत पंचनामा सुरू केला. फरार डंपर चालकाचा शोध घेण्यात येत असून, अपघाताचा पुढील तपास पोलीस करत आहेत.