रणजीत माजगावकर, कोल्हापूर प्रतिनिधी, साम टीव्ही मराठी

Kolhapur Vadgaon Hatkanangale road accident CCTV video : कोल्हापूरमधील वडगाव-हातकणंगले रस्त्यावरील काळजाचा ठोका चुकवणारा अपघात झाला. भरधाव वेगाने आलेल्या एका कारने समोरून येणाऱ्या दुचाकीला जोरदार धडक दिली. ही धडक इतकी भीषण होती की दुचाकीवरील पती-पत्नी हवेत फुटबॉलसारखे उडून रस्त्यावर लांब जाऊन फेकले गेले. या भीषण अपघातात पतीचा जागीच दुर्दैवी अंत झाला, तर पत्नी गंभीर जखमी झाली आहे. सकाळी आठच्या सुमारास घडलेला हा अंगावर काटा आणणारा प्रसंग सीसीटीव्ही (CCTV) कॅमेऱ्यात कैद झाला आहे. हा व्हिडिओ पाहून कोणाच्याही अंगाचा थरकाप उडेल असा आहे.

नेमकं काय घडलं?

मिरज येथील रहिवासी दीपक रावसाहेब शिंदे आणि त्यांच्या पत्नी आशादेवी शिंदे हे रविवारी वडगाव येथील हनुमान रोड परिसरातील आपल्या आजारी नातेवाईकाला भेटण्यासाठी आले होते. रात्री नातेवाईकांकडे मुक्काम केल्यानंतर, सोमवारी सकाळी ८ च्या सुमारास दोघेही पती-पत्नी मोटारसायकलवरून पुन्हा मिरजच्या दिशेने निघाले होते.

ते मिनचे गावाजवळ आले असता, समोरून आलेल्या भरधाव एर्टिगा कारने त्यांच्या दुचाकीला थेट धडक दिली. या भीषण अपघातात दीपक शिंदे यांचा जागीच मृत्यू झाला, तर त्यांच्या पत्नी आशादेवी या गंभीर जखमी झाल्या.

स्थानिकांची मदतीसाठी धाव, CCTV व्हिडिओ समोर

अपघात घडताच परिसरातील स्थानिकांनी तातडीने घटनास्थळी धाव घेतली. गंभीर जखमी झालेल्या आशादेवी शिंदे यांना उपचारासाठी तातडीने जवळच्या खासगी रुग्णालयात दाखल करण्यात आले आहे. घटनेची माहिती मिळताच पोलिसांनी घटनास्थळी पोहोचून पंचनामा केला असून, सीसीटीव्ही फुटेजच्या आधारे पुढील कायदेशीर कारवाई व तपास सुरू आहे.