Maharashtra Weather Monsoon Update Today 4th June राज्यात उकाड्याने नागरिक हैराण झालेले असताना दुसरीकडे आनंदाची बातमी समोर आली आहे. मान्सूनची प्रतिक्षा संपली असून पुढच्या काही तासांमध्ये मान्सून केरळमध्ये दाखल होणार असून अनेक ठिकाणी वादळी वाऱ्यासह पावसाची शक्यता वर्तवण्यात आली आहे. IMD च्या ताज्या अंदाजानुसार, आज मुंबई, कोकण, ठाणे, पालघरसह अनेक जिल्ह्यांमध्ये सोसाट्याच्या वाऱ्यासह जोरदार पावसाची शक्यता असल्याने येलो अलर्ट देण्यात आला आहे. या पार्श्वभूमीवर नागरिकांना सतर्क राहण्याचे आवाहन करण्यात आले आहे.

हवामान विभागाच्या अंदाजानुसार, मुंबई (Mumbai Rain Alert), रायगड आणि सिंधुदुर्ग जिल्ह्यांत आज विजांच्या कडकडाटासह मध्यम ते जोरदार पाऊस पडण्याची शक्यता आहे. कोकण (Kokan Rainfall Alert) किनारपट्टीवर पावसाचा जोर कायम राहण्याचा अंदाज असून पालघर आणि ठाणे जिल्ह्यांत उष्ण व दमट हवामानासह दुपारनंतर मेघगर्जनेसह पावसाच्या सरी कोसळण्याची शक्यता आहे.

मध्य महाराष्ट्रातील धुळे, नंदुरबार, नाशिक आणि जळगाव जिल्ह्यांत हलक्या स्वरूपाच्या पावसाचा अंदाज वर्तवण्यात आला आहे. नाशिकच्या (Nashik Weather ) घाट परिसरात विजांच्या कडकडाटासह पाऊस पडू शकतो, तसेच काही भागांत वाऱ्यांचा वेग वाढण्याची शक्यता आहे. पुणे, सातारा, कोल्हापूर, सांगली आणि सोलापूर जिल्ह्यांतही मेघगर्जनेसह पावसाचा अंदाज व्यक्त करण्यात आला असून, काही ठिकाणी वादळी वारे वाहू शकतात. घाटमाथा परिसरात मध्यम ते जोरदार पाऊस पडण्याची शक्यता हवामानशास्त्र विभागाने वर्तवली आहे.

दरम्यान, विदर्भात (Vidarbha Heatwave ) उन्हाचा चटका कायम आहे. काल अनेक ठिकाणी तापमान ४० अंश सेल्सिअसच्या पुढे नोंदविण्यात आले. विशेषतः वर्धा जिल्ह्यात जोरदार वादळी पावसाची शक्यता लक्षात घेऊन हवामान विभागाने ऑरेंज अलर्ट जारी केला आहे. उर्वरित राज्यासाठी यलो अलर्ट देण्यात आला असून नागरिकांना सतर्क राहण्याचा सल्ला देण्यात आला आहे.

दुसरीकडे, मॉन्सूनची प्रगतीही वेगाने सुरू आहे. शनिवारी मॉन्सूनने लक्षद्वीप बेटे, अरबी समुद्राचा काही भाग, कोमोरिन क्षेत्र तसेच बंगालच्या उपसागरातील काही भाग व्यापला होता. सध्या केरळ, तमिळनाडूच्या काही भागांसह अरबी समुद्र आणि बंगालच्या उपसागरातील आणखी काही क्षेत्रांमध्ये मॉन्सूनच्या आगमनासाठी अनुकूल परिस्थिती निर्माण झाली आहे. त्यामुळे पुढील काही तासांमध्ये केरळमध्ये मॉन्सून दाखल होण्याची शक्यता हवामान विभागाने व्यक्त केली आहे. राज्यातील शेतकरी आणि नागरिकांचे लक्ष आता मॉन्सूनच्या आगमनाकडे लागले आहे.