सुशिल थोरात, प्रतिनिधी

Grampanchayat Election Result:

राज्यात सर्वत्र ग्रामपंचायत निवडणूकांची धुलवड सुरू आहे. राज्याच्या राजकारणात झालेल्या मोठ्या उलथापालथीनंतर या निवडणूका सर्वांसाठीच प्रतिष्ठेच्या बनल्या होत्या. त्यामुळे ग्रामपंचायत निवडणुकीत गुलाल कोण उधळणार याकडे संपूर्ण राज्याचे लक्ष लागले होते. निवडणूक निकालामध्ये भाजपची सरशी पाहायला मिळत असून कर्जत जामखेडमध्ये रोहित पवार यांना मोठा धक्का बसला आहे.

राज्यातील ग्रामपंचायत निवडणूकांचे निकाल समोर येत आहेत. ग्रामपंचायत निकालामध्ये जनतेने भाजप- शिंदे गट आणि अजित पवारांच्या राष्ट्रवादी गटाच्या बाजूने कौल दिला आहे. विशेष म्हणजे राष्ट्रवादी शरद पवार गटाचे आमदार रोहित पवार (Rohit Pawar) यांनाही कर्जत जामखेड मतदारसंघात मोठा धक्का बसला असून भाजपने बाजी मारली आहे.

कर्जत जामखेड तालुक्यातील एकूण ९ पैकी ५ जागा मिळवत भाजपने (BJP) वर्चस्व सिद्ध केले आहे. तर शरद पवार गटाचे आमदार रोहित पवार यांच्याकडे २ जागा आणि अजित पवार गटाकडे १ तर स्थानिक आघाडीला एक जागा मिळाली आहे. या निकालाने आमदार रोहित पवार यांच्यासाठी मोठा धक्का मानला जात असून भाजपाचे विधानपरिषद आमदार राम शिंदे यांचे वर्चस्व कायम राहीले आहे.

बारामतीत अजित पवारांचा दरारा..

ग्रामपंचायत निवडणुकीत  सर्वाधिक चुरशीची ठरलेल्या बारामती तालुक्यातील ग्रामपंचायतीचे निकाल हाती आली असून अजित पवार गटाने सर्वाधिक जागांवर विजयी गुलाल उधळला आहे. अजित पवार गटाने निकाल लागलेल्या ३१ ग्रामपंचायतींपैकी तब्बल २६ ग्रामपंचायतीवर विजयी झेंडा फडकवला आहे. (Latest Marathi News)