अभिजीत देशमुख
कल्याण : आगामी विधानसभा निवडणुकीच्या दृष्टीने राजकीय पक्षांकडून मोर्चेबांधणी सुरु झाली आहे. अनेक विधानसभा मतदार संघावर दवे प्रतिदावे केले जात आहेत. अशातच कल्याण पूर्वेत भाजप व शिवसेना शिंदे गट यांच्यात रस्सीखेच सुरु असल्याचे पाहण्यास मिळत आहे. 

कल्याण (Kalyan) पूर्वेत शिवसेना शिंदे गट शहर प्रमुख महेश गायकवाड यांचे भावी आमदार या आशयाचे बॅनर झळकल्याने राजकीय चर्चाना उधाण आलं आहे. एकीकडे महेश गायकवाड यांच्यावर गोळीबार करणाऱ्या (BJP) भाजपचे आमदार गणपत गायकवाड यांची पत्नी सुलभा गायकवाड यांनी भाजपकडून विधानसभा निवडणुकीची तयारी सुरु केली आहे. तर दुसरीकडे महेश गायकवाड यांचे वाढदिवसानिमित्त कल्याण पूर्वेत बॅनर लागल्याने राजकीय वातावरण तापण्याची शक्यता आहे. कल्याण पूर्व मतदारसंघावर शिवसेना शिंदे गटाने दावा केला आहे. 

शिंदे गटातून तिघे इच्छुक 

शिवसेना शिंदे गटाकडून शिवसेना शहर प्रमुख महेश गायकवाड, विधानसभा प्रमुख निलेश शिंदे, पदाधिकरी विशाल पावशे हे इच्छुक असून त्यांची निवडणुकीच्या पार्श्वभूमीवर तयारी देखील सुरू आहे. मात्र या मतदार संघात भाजपचे आमदार गणपत गायकवाड आहेत. त्यामुळे भाजपने ही जागा आमच्याकडेच राहिल असं स्पष्ट केलं आहे. त्यामुळे या जागेवरून सुरू असलेली रस्सीखेच पाहता जागा वाटपाच्या वाटाघाटीत जागा कुणाच्या वाट्याला जाते, युतीतील वरिष्ठ नेते काय निर्णय घेतात? हे पाहणं महत्त्वाचं ठरणार आहे.