अभिजित देशमुख

कल्याण : बॅटरीच्या दुकानाची रेकी करत रात्रीच्या सुमारास दुकानाचे शटर तोडून महागड्या बॅटऱ्या चोरणाऱ्या त्रिकूटाला (Kalyan) कल्याण मधील कोळशेवाडी पोलिसांनी (Police) बेड्या ठोकल्या. ही टोळी इन्व्हर्टर व गाड्यांच्या बॅटरीची चोरी करत होती. (Live Marathi News)

कल्याण मधील पूर्वेकडील चक्की नाका परिसरात एका बॅटरीच्या दुकानात रात्रीच्या सुमारास अज्ञात चोरट्यांनी चोरी करत लाखो रुपयांची बॅटरी चोरून नेल्या होत्या. याप्रकरणी कोळशेवाडी पोलीस ठाण्यात गुन्हा दाखल करण्यात आला होता. पोलिसांनी या चोरट्यांचा शोध सुरू केला. चोरट्यांची ओळख पटवून पोलिसांनी अवघ्या काही दिवसातच टोळीला बेड्या ठोकल्या. नौशाद खान, मुजीब खान, सलमान खान अशी या तीन चोरट्यांची नावे असून हे तिघे मुंब्रा कसा येथील राहणारे आहेत. 

अडीच लाखाच्या बॅटरी जप्त 

या तिघांकडून वाहनाची, इन्व्हर्टरची बॅटरी अशा अडीच लाख रुपये किमतीच्या बॅटरी व एक गाडी जप्त करण्यात आली आहे. हे चोरटे वाहनांची व इन्व्हर्टरला लागणारा बॅटरी चोरी करायचे. यासाठी ते बॅटरीच्या दुकानांची रेकी करत व रात्रीच्या सुमारास संधी साधत या दुकानांमधील बॅटरी चोरी करायचे.  दोघांविरोधात यात देखील बॅटरी चोरीचे अनेक गुन्हे दाखल असल्याची माहिती पोलिसांनी दिली.