अभिजित देशमुख 
कल्याण : कल्याण पूर्वेतून उल्हासनगर क्राईम ब्रँच आणि कोळशेवाडी पोलिसांनी बांगलादेशी घुसखोर दाम्पत्याला गुन्हा दाखल करत अटक केली आहे. हसन आणि अंजुरा हसन असे या दोघांची नावे आहेत. हे दोघे मागील सात ते आठ वर्षांपासून कल्याण पूर्वच्या विठ्ठलवाडी परिसरात वास्तव्यास होते. 

कल्याणच्या कोळशेवाडी पोलीसांनी कल्याण पूर्वेतून घुसखोर बांगलादेशी दाम्पत्याला अटक केली आहे. कमल हसन आणि अंजुरा हसन असे पोलिसांनी ताब्यात घेतलेल्या पती- पत्नीचे नावे आहेत. कमल हा कल्याणमध्ये ड्रायव्हर म्हणून काम करत होता. तर अंजुरा ही एका बारमध्ये काम करत होती. मागील काही वर्षांपासून हे दाम्पत्य परिसरात वास्तव्यास असताना याबाबत कोणालाही माहिती नव्हती. 

दरम्यान दोघे पती- पत्नी कल्याण पूर्वेतील विठ्ठलवाडी परिसरात चाळीत भाड्याने घर घेऊन राहत असल्याची माहिती पोलिसांना मिळाली होती. या माहितीच्या आधारे पोलिसांनी सापळा रचत या दोघांना ताब्यात घेतले आहे. सात ते आठ वर्षांपूर्वी भारतात घुसखोरी करत बेकायदेशीररित्या वास्तव्य करत असल्याची प्राथमिक माहिती समोर आली आहे.

दरम्यान दोघांना ताब्यात घेल्यानंतर पोलिसांकडून हसन दाम्पत्यासोबत आणखी कुणी बांगलादेशी नागरिक परिसरात किंवा शहरात अन्य कोणत्या ठिकाणी आहेत का? किती वर्षांपासून ते इथे राहतात. या प्रकरणी कोळशेवाडी पोलीस पुढील तपास करत आहेत. चौकशीअंती आणखी काही माहिती बाहेर येण्याची शक्यता वर्तविली जात आहे.