सातारा : साताऱ्यातील (satara) पुसेगावमध्ये शनिवारी रात्री पुसेगावात सेवागिरी मंदिरा समोर अगदी मध्यवर्ती ठिकाणी एक भयानक प्रसंग घडला. रात्री उशिरा अंधाराचा फायदा घेत एका व्यक्तीने थांबलेली कार पाहून त्यात घुसून महिला (women) व लहान मुलगा असताना ही कार घेऊन पळून जायचा प्रयत्न केला मात्र गाडीतील जयश्री गोरे (jayshree gore) यांनी दाखवलेल्या प्रसंगावधान आणि केलेल्या विरोधामुळे त्या चोरट्याचा बेत फासला. या कुटुंबाने पोलिसांत (police) धाव घेतली आणि पोलिसांनी काही वेळातच चोरट्याच्या मुसक्या आवळल्या. (satara latest marathi news)

जयश्री गोरे आणि त्यांचे पती महेश हे आपल्या चार महिन्याचा मुलासह , आठ वर्षाच्या मुलीसह , भाची आणि दाजी यांच्या समवेत कामानिमित्त शिखर शिंगणापूर येथे गेले होते. रात्रीच्या सुमारास ते पुसेगाव येथे आल्यानंतर तहान लागल्याने पाणी घेण्यासाठी जयश्री यांचे पती महेश आणि दाजी हे दोघेही कारमधून उतरले. ते पाण्याची बाटली आणण्यासाठी गेले. यावेळी कारमध्ये जयश्री गोरे या चालकाच्या सीटलगत बसल्या होत्या. त्यांच्याजवळ त्यांचे लहान बाळ होते. यावेळी अचानक कारमध्ये एक युवक घुसला. त्याने कारचा ताबा घेतला आणि कार पळवू लागला.

अचानक घडलेल्या या प्रकारामुळे जयश्री गाेरेंसह कारमधील सर्वजण घाबरले. या परिस्थितीत जयश्री गोरे यांनी तान्ह्या बाळासह युवकाशी सुमारे अर्धा किलोमीटर पर्यंत झुंज दिली. अक्षरशः लाथाबुक्क्यांनी युवकास मारले. त्यामुळे कार एका लाकडाच्या ढिगाऱ्यावर जावून आदळली. त्यानंतर युवकाने घटनास्थळावरुन पलायन केले.

हा सगळा थरार दहा मिनिट सुरू होता. चालत्या कारमध्ये झालेल्या झटापटीत बाळासह जयश्री गोरे किरकाेळ जखमी झाल्या आहेत. पुसेगाव पोलिसांनी अभिजित फडतरे यास अटक करुन न्यायालयात हजर केले असता त्यास न्यायालयाने दाेन दिवसांची पाेलीस काेठडी सुनावली आहे.

Edited By : Siddharth Latkar