अक्षय शिंदे, जालना

जालन्यातील बापकळ परिसरात अवैध गौण खनिज उत्खननावर कारवाईसाठी गेलेल्या तलाठ्याला मारहाण करण्यात आली आहे याप्रकरणी मौजपुरी पोलीस ठाण्यात दोन संशयित आरोपींविरोधात गुन्हा दाखल करण्यात आला आहे.

मात्र पोलिस आरोपींना अटक न करता आरोपींना पाठीशी घालत असल्याचा आरोप तलाठी संघटनेने केला आहे.आरोपींना तात्काळ अटक करण्याची मागणी करत तलाठी संघटनेने जालना तहसीलदारांना निवेदन देखील दिलं आहे. दरम्यान पुढील दोन दिवसांत आरोपींना अटक न झाल्यास तलाठी संघटना गौण खनिज काम बंद आंदोलन करेल असा इशारा देण्यात आला आहे.

तलाठ्याला बापकळ शिवारात झाली मारहाण

गौण खनिजाचे उत्खनन सुरू असल्याची माहिती मिळाल्यानंतर कारवाईसाठी गेलेल्या तलाठ्याला चापट बुक्क्यांनी मारहाण करून वाहने पळवून नेल्याची घटना जालना तालुक्यातील बापकळ परिसरात घडली आहे.या प्रकरणात हिवरा रोशनगावचे तलाठी पंकज ढाकरे यांनी दिलेल्या फिर्यादीवरून दोन जणांविरोधात मौजपुरी पोलीस ठाण्यात गुन्हा दाखल करण्यात आला आहे. सचिन सावंत आणि रियाज सय्यद अशी संशयित आरोपींची नावे आहेत.

गौण खनिज काम बंद करण्याचा इशारा

जालना जिल्ह्यात महसूल कर्मचाऱ्यांना मारहाणीच्या घटना वाढत आहे. यामुळे महसूल कर्मचाऱ्यांमध्ये भीतीच वातावरण तयार झाल असून शासनाची कर्तव्य बजेत असताना, मोठ्या प्रमाणात अडचण निर्माण होत असल्याची भावना महसूल कर्मचाऱ्यांमध्ये आहे. दरम्यान या प्रकरणानंतर पोलिसांनी आरोपींना अटक न केल्यामुळे, तलाठी संघटनेने तहसीलदारांना निवेदन देऊन पोलीस प्रशासन आरोपींना पाठीशी घालत असल्याच म्हटल आहे. तर येणाऱ्या दोन दिवसांमध्ये आरोपींना अटक न केल्यास तलाठी संघटना गौण खनिज काम बंद आंदोलन करेल असा इशाराही दिला आहे.