अक्षय शिंदे, साम टीव्ही

जालना : जालन्यात अज्ञात वाहनाच्या धडकेत दुचाकीवरील दोघांचा जागीच मृत्यू झाल्याची घटना जालन्याच्या बावणे पांगरी शिवाराजवळ घडलीय. जालना राजुर रोडवरील बावणे पांगरी शिवारात काल रात्री साडेनऊ वाजेच्या सुमारास हा अपघात झालाय. प्रशांत पवार (वय २४) आणि निकिता राठोड (वय २३) अशी अपघातात मृत झालेल्या दोघांची नावे आहेत.

प्रशांत आणि निकिता हे दोघे दुचाकीने राजूरहून जालन्याच्या पारेगावकडे निघाले होते. यादरम्यान बावणे पांगरी येथे त्यांच्या दुचाकीला अज्ञात वाहनाने जोराची धडक दिली. यात दोघांचा जागीच मृत्यू झालाय. या घटनेनंतर दोन्ही मयतांचा मृतदेह स्थानिक नागरिकांनी जिल्हा सामान्य रुग्णालयात पाठवला असता डॉक्टरांनी त्यांना तपासून मृत घोषित केले. या घटनेमुळे परिसरात हळहळ व्यक्त केली जातेय. मयत निकिता राठोड ही मुंबई पोलीस दलात कार्यरत असल्याची माहिती देखील समोर आली आहे.

एका बाईकवर निकिता आणि प्रशांत हे दोघे होते, त्यांच्यासोबत एक मुलगी आणि मुलगा हे दुसऱ्या बाईकवर होते. अद्याप त्या दोघांची माहिती समोर आलेली नाहीय. या भीषण अपघातात प्रशांत आणि निकिता या दोघांचा दुर्दैवी अंत झाला आहे.