जालना : मराठा समाजाला ओबीसी प्रवर्गातून आरक्षण देण्यात यावं या मागणी मराठा आंदोलक मनोज जरांगे पाटील गेल्या वर्षभरापासून लढा देत आहेत. सगेसोयरे अध्यादेश आणि हैदराबाद गॅझेटचे मागणी करत जरांगेंनी सहाव्यांदा अंतरवाली सराटी येथे उपोषण सुरु केलं आहे. आज रविवारी (ता २२) त्यांच्या उपोषणाचा सहावा दिवस आहे.

मनोज जरांगे पाटील यांची तब्येत खालवत चालली आहे. त्यामुळे मराठा बांधवांचे पाय अंतरवाली सराटीच्या दिशेने वळू लागले आहेत. दरम्यान, मराठवाड्यातील अनेक महिला अंतरवाली सराटी येथे दाखल झाल्या असून त्यांनी जरांगे यांना उपोषण सोडण्याची विनंती केली आहे. त्याचबरोबर राज्य सरकारला देखील कडक शब्दात इशारा दिला आहे.

साम टीव्हीसोबत बोलताना मराठा भगिणी म्हणाल्या, सरकारने आमची मागणी पूर्ण करून मराठा समाजाला तातडीने आरक्षण द्यावे. तसेच जरांगे पाटलांचे उपोषण सोडवण्यासाठी पुढाकार घ्यावा. आमच्या भावाला काही झाले तर सरकारला सोडणार नाही, असा कडक इशाराही महिलांनी दिला.

आज आमचा भाऊ ६ दिवसांपासून अन्नपाण्याविना तडफडतो आम्हाला घरात बसून जेवणाचा घास कसा जाणार? असं म्हणत मराठा भगिणींनी अश्रूला वाट मोकळी करून दिली. जरांगे यांची प्रकृती खालावत चालल्याने अंतरवाली सराटी येथे मराठा बांधवांची मोठी गर्दी जमत आहेत.

दुसरीकडे राज्य सरकारने देखील जरांगे यांच्या काही मागण्या मान्य करण्यासाठी पाऊले उचलली आहे. मराठा आंदोलकांवरील बरीच गुन्हे मागे घेण्यात आली असून फक्त ३४ गुन्हे बाकी आहेत. गृहमंत्र्यांसोबत चर्चा करून आम्ही तेही मागे घ्यायला तयार असल्याचं मंत्री शंभुराज देसाई यांनी म्हटलं आहे.

मुख्यमंत्री एकनाथ शिंदे यांनी तातडीने जरांगे यांना उपचारासाठी रुग्णालयात दाखल करा. तसेच त्यांचे उपोषण सोडवण्यासाठी प्रयत्न करत असल्याचं आम्हाला सांगितल्याचं शंभुराज देसाई म्हणाले आहेत. त्यामुळे मनोज जरांगे पाटील यांच्या सर्व मागण्या मान्य होणार का? हे पाहणं महत्वाचं ठरणार आहे.