अक्षय शिंदे 
जालना : इंडियन प्रीमियर लीग अर्थात आयपीएल टी २० क्रिकेट मॅचचा सध्या थरार सुरु आहे. येतॉ प्रत्येक मॅचवर जोरदार सट्टा चालविला जात आहे. अशातच जालन्यात आयपीएल क्रिकेट मॅचवर सट्टा लावणाऱ्या दोघांना पोलिसांनी जेरबंद केले आहे. जालन्याच्या सदर बाजार पोलिसांनी ही कारवाई केली असनू या कारवाईत १ लाख ५७ हजार रुपये किंमतीचा मुद्देमाल पोलिसांनी जप्त केला आहे. 

आयपीएल क्रिकेट मॅच रोमांचक स्थितीत पोहचली आहे. रोज मॅच होत असून कोण जिंकणार, कोण किती रन काढणार याचे गणित बांधले जात आहे. यासाठी ऑनलाईन सट्टेबाजार जोरदार सुरु आहे. त्यानुसार जालन्यामध्ये देखील जोरदार सट्टा चालविला जात होता. याठिकाणी सदर बाजार पोलिसांनी कारवाई करत स्वप्नील राठी आणि मोहन खाकिवाले यांना ताब्यात घेण्यात आले आहे. 

मोबाईलवरून सुरू होता सट्टा 

स्वप्नील राठी आणि मोहन खाकिवाले हे दोन तरुण आयपीएल क्रिकेट मॅचवर सट्टा लावत असल्याची गुप्त माहिती सदर बाजार पोलिसांना मिळाली होती. त्या माहितीवरून सदर बाजार पोलिसांनी सदरील दोन तरुणांना जुना मोंढा भागातून ताब्यात घेतलं. यावेळी पोलिसांनी त्यांचे मोबाईल फोन तपासले असता त्यांनी मोबाईलवरून ऑनलाईन पद्धतीने क्रिकेट मॅचवर सट्टा लावल्याच समोर आलं. 

दीड लाख रुपयांचा मुद्देमाल हस्तगत 

पोलिसांनी दोन्ही सट्टेबाजांना विचारपूस केली असता त्यांनी बुकी शौर्य घोसले याच्या सांगण्यावरून सट्टा लावल्याचे कबूल केलं. या कारवाईत पोलिसांनी २ हजार रुपये रोख आणि २ महागडे मोबाईल असा एकूण १ लाख ५७ हजार रुपये किंमतीचा मुद्देमाल जप्त केलाय. सट्टेबाजारात मोठे रॅकेट असण्याची शक्यता असून या प्रकरणी पोलीस अधिक तपास करीत आहेत.