अक्षय शिंदे 
जालना :क्रीडा प्रबोधिनीमध्ये दाखल चार विद्यार्थिनींचा त्यांच्याच क्रीडा शिक्षकाने विनयभंग केल्याची धक्कादायक घटना जालन्यातून समोर आली आहे. सदर विद्यार्थिनींनी शिक्षकाने केलेला प्रकार सांगितल्याने हि घटना समोर आली असून या प्रकरणी पोलिसात गुन्हा दाखल करण्यात आला आहे. तर पोलिसांनी सदर क्रीडा शिक्षकास ताब्यात घेतले असून पुढील तपास सुरु आहे. 

राज्यात महिला- मुलींवरील अत्याचार व विनयभंगाच्या घटना सातत्याने घडत आहेत. रोज कुठे ना कुठे या घटना घडत असून अशीच घटना जालना शहरात घडली आहे. जालना शहरातील गांधी चमन परिसरात असलेल्या क्रीडा प्रबोधनीमध्ये जाणाऱ्या चार विद्यार्थिनींचा त्यांच्याच एका क्रीडा शिक्षकाने विनयभंग केल्याचा संतापजनक प्रकार समोर आला आहे. अर्थात गुरु व शिष्य या नात्याला काळिमा फासणारी हि घटना आहे. 

क्रीडा शिक्षक पोलिसांच्या ताब्यात 

दरम्यान मुलींनी घडला प्रकार घरी सांगितल्याने घटना उजेडात आली आहे. याप्रकरणी गटशिक्षण अधिकारी यांच्या फिर्यादीवरून संशयित आरोपी क्रीडा शिक्षकाविरोधात पोस्कोसह इतर कलमान्वय जालन्यातील कदीम पोलीस ठाण्यात गुन्हा दाखल करण्यात आला आहे. प्रमोद खरात असं या संशयित आरोपी क्रीडा शिक्षकाचे नाव असून पोलिसांनी काल रात्री संशयित आरोपी शिक्षकाला बेड्या ठोकल्या आहे. 

पोलिसांकडून तपास सुरु 

जालन्यात एका क्रीडा प्रबोधिनीमध्ये हा गंभीर प्रकार घडल्याने याठिकाणी येणाऱ्या मुलींच्या सुरक्षिततेचा प्रश्न निर्माण झाला आहे. पोलिसांनी शिक्षकाला ताब्यात घेतले असून या शिक्षकाने अजून काही विद्यार्थिनीशी गैरवर्तन केल आहे का? काही विद्यार्थिनी अजून पीडित आहे का ? याचा तपास आता पोलीस करत आहे.