जळगाव जिल्ह्यातील रावेर तालुक्यातील सातपुडा पर्वत भागतील मोहगण परिसर भूकंपाच्या सौम्य धक्क्यांनी हादरला. आज म्हणजेच मंगळवारी सकाळी सकाळी ७ वाजून ५७ मिनिटांनी भूकंपाचे धक्के जाणवले. हाती आलेल्या माहिती हा भूकंप ३.३ रिश्टर स्केलचा असल्याची नोंद करण्यात आलीय. दरम्यान सौम्य धक्का असल्यानं ग्रामस्थांना या भूकंपाची जाणीव झाली नाही.

तसेच कोणतीही जीवित वित्तहानी झाली नसल्याचं प्रशासनाकडून सांगण्यात येत आहे. राष्ट्रीय भूकंप विज्ञान केंद्राच्या (NCS) अधिकृत नोंदीनुसार, भूकंपाची तीव्रता ३.३ रिश्टर स्केल इतकी असून, त्याची खोली जमिनीखाली ५ किलोमीटर असल्याचे नमूद करण्यात आले आहे. NCS च्या नोंदीनुसार या भूकंपाची वेळ सकाळी ७.५७ वाजून ३३ सेकंद अशी आहे.

राष्ट्रीय भूकंप विज्ञान केंद्राच्या माहिती नुसार रावेर तालुक्यातील मोहगण ब्रु येथे भूकंपाचा केंद्र बिंदू होता. यामुळे प्रशासनाकडून खबरदारी घेण्याचे आवाहन करण्यात आलंय. भूकंपाची तीव्रता कमी असल्याने तालुक्यात या धक्क्याची जाणीव ग्रामस्थांना झाली नाही. शासनाकडून भूकंपाबाबत माहिती महसूल प्रशासनाला देण्यात आलीय.

प्रभारी तहसीलदार संजय तायडे यांनी मंडळाधिकारी अनंत खवले व तलाठी समिर तडवी यांना याबाबत सूचना दिल्या आहेत. त्यांनी या परिसरात जाऊन परिस्थिती बाबत माहिती घेतली. मात्र भूकंपाची तीव्रता कमी असल्यामुळे कोणतीही जाणीव झाली नाही. कोणतेही जीवित व वित्तहानी झाली नसल्याचा अहवाल तलाठी व मंडळ अधिकारी यांनी दिला असल्याचे तहसीलदार तायडे यांनी सांगितले.

महसूल प्रशासनाकडून परिस्थितीवर लक्ष

राष्ट्रीय भूकंप विज्ञान केंद्र हे देशातील भूकंपीय हालचालींचे निरीक्षण करणारे भारत सरकारचे नोडल केंद्र आहे. देशभरातील भूकंपीय हालचालींवर केंद्राकडून २४ तास लक्ष ठेवले जाते.रावेर तालुक्यातील भूकंपाचा धक्का सौम्य स्वरूपाचा असल्याने नागरिकांनी घाबरून जाऊ नये, असे आवाहन प्रशासनाकडून करण्यात आले आहे. कोणत्याही अफवांवर विश्वास न ठेवता अधिकृत माहितीवरच विश्वास ठेवावा, असेही प्रशासनाने स्पष्ट केले आहे.