रावेर (जळगाव) : राज्याच्या सामीलगत असलेल्या मध्य प्रदेशातील बंभाळा येथे लग्न समारंभासाठी गेले असता लग्न सोहळा पार पडून परतलेल्या महिलेवर काळाने झडप घातली. राज्य परिवहन महामंडळाच्या बसने दुचाकीला जोरदार धडक दिल्याने दुचाकीवरील महिला फेकली जाऊन तिचा जागीच मृत्यू झाल्याची घटना रावेरजवळ घडली. 

रावेर (Raver) तालुक्यातील बामणोद येथील रहिवासी आरती संदीप पाटील असे अपघातात मृत झालेल्या महिलेचे नाव आहे. मध्य प्रदेश (Madhya Pradesh) राज्यातील बंभाळा येथे लग्न असल्याने आरती पाटील या गेल्या होत्या. दरम्यान लग्न व ओवाळनीचा कार्यक्रम आटोपून आरती पाटील मोटर सायकलवरून घरी येत होत्या. याच दरम्यान राज्य परिवहन महामंडळच्या बस चालकाने मोटर सायकलला मागून जोरदार धडक दिली. मागून धडक बसल्याने मोटर सायकलवर मागे बसलेल्या आरती पाटील या फेकल्या गेल्या. यात त्यांचा जागीच मृत्यू झाला. हा अपघात रावेर शहराच्या जवळ घडला.  

बस चालकावर गुन्हा दाखल 

आरती यांच्या निधनाची बातमी समजताच कुटुंबीयांनी एकच आक्रोश केला. आरती पाटील यांना दोन मुली आणि एक मुलगा आहे. सदर (Accident) अपघातानंतर महामंडळाच्या बसला रावेर पोलिस स्टेशनमध्ये आणण्यात आले. तर अपघाताबाबत पोलिसात नोंद करत चालकाविरुद्ध गुन्हा दाखल करण्यात आला आहे.