संजय महाजन, जळगाव

जळगाव जिल्ह्यातील सार्वजनिक बांधकाम विभागात मोठ्या लाचखोरीचा प्रकार उघडकीस आला आहे. शाखा अभियंता योगेश अहिरे यांना लाचलुचपत प्रतिबंधक विभागाने रंगेहाथ अटक केली आहे. बिल मंजूर करून देण्यासाठी तब्बल १५ लाख रुपयांची मागणी करत अखेर ५ लाखांची लाच स्वीकारताना एसीबीच्या पथकाने ही कारवाई केली. या घटनेमुळे सार्वजनिक बांधकाम विभागात एकच खळबळ उडाली आहे.

मिळालेल्या माहितीनुसार, जळगाव जिल्ह्यातील एका मक्तेदाराचे सार्वजनिक बांधकाम विभागाकडे मोठे बिल बाकी होते. हे बिल मंजूर करून रक्कम मिळवून देण्यासाठी संबंधित तक्रारदारने शाखा अभियंता योगेश अहिरे यांच्याशी संपर्क साधला होता. मात्र, बिल काढून देण्यासाठी अहिरे यांनी थेट १५ लाख रुपयांच्या लाचेची मागणी केल्याचा आरोप आहे. सुरुवातीला तक्रारदारला मोठी रक्कम देण्याचा दबाव टाकण्यात आला होता.

तक्रारदार लाच देण्यास तयार नसल्याने त्यांनी थेट लाचलुचपत प्रतिबंधक विभागाकडे धाव घेतली. एसीबीने तक्रारीची पडताळणी केली असता लाच मागितल्याचे स्पष्ट झाले. त्यानंतर अधिकाऱ्यांनी सापळा रचण्याचा निर्णय घेतला. शनिवारी दुपारच्या सुमारास सार्वजनिक बांधकाम विभागाच्या कार्यालय परिसरात तडजोडीनंतर ५ लाख रुपयांची रक्कम स्वीकारताना योगेश अहिरे यांना एसीबीच्या पथकाने रंगेहाथ पकडले.

या कारवाईमुळे सार्वजनिक बांधकाम विभागात एकच खळबळ उडाली असून, कार्यालय परिसरात नागरिक आणि कर्मचाऱ्यांमध्ये चर्चेला उधाण आले आहे. एसीबीच्या अधिकाऱ्यांनी आरोपी शाखा अभियंत्याविरोधात गुन्हा दाखल करण्याची प्रक्रिया सुरू केली असून, या प्रकरणात आणखी कोणाचा सहभाग आहे का याचाही तपास सुरू करण्यात आला आहे. दरम्यान, सरकारी कार्यालयांमधील वाढत्या भ्रष्टाचाराच्या घटनांमुळे नागरिकांमध्ये नाराजी व्यक्त होत आहे.