जळगाव : आषाढी एकादशीनिमित्ताने पंढरपुरात सर्वात प्रथम प्रवेश करणारी श्री संत मुक्ताई पालखी सोहळ्याचे आज पंढरपूरच्या दिशेने प्रस्थान झाले आहे. विठुरायाच्या भेटीसाठी संत मुक्ताबाई पालखी सोहळा मुक्ताईनगर तालुक्यातील कोथळी मधून पंढरपूरच्या दिशेने मार्गस्थ झाला असून पालखी सोहळा प्रस्थान करतेवेळी हरिनामाच्या जयघोषाने अवघी मुक्ताईनगरी दुमदुमून गेली होती. 

आषाढी वारीचे वेध वारकऱ्यांना लागलेले असतात. पुढील महिन्यात म्हणजे ६ जुलैला आषाढी एकादशी असल्याने राज्यभरातून पायी दिंड्या पंढरपूरच्या दिशेने मार्गस्थ होणार आहेत. यात राज्यातील सर्वात पहिला पालखी सोहळा संत मुक्ताबाई यांचा निघत असतो. वारकऱ्यांच्या उपस्थितीत संत मुक्ताईच्या पादुका पंढरपूरला ३३ दिवसांचा ७५० किलोमीटरचा पायी प्रवास करत जाणार आहे. 

पंढरपुरात प्रथम प्रवेशाचा मान 

दरवर्षी वारी आषाढी एकादशीला विठ्ठल रखुमाईच्या भेटीसाठी पंढरपुरात प्रथम प्रवेशाचा मान ज्या संतश्रेष्ठ माऊलीच्या दिंडीला दिला जातो. त्या संत मुक्ताईंच्या दिंडीला तीन शतकांपेक्षा अधिक वर्षांची परंपरा लाभली आहे. जळगाव जिल्ह्यातील कोथळी येथील संत मुक्ताई संस्थानाच्यावतीने दिंडी दरवर्षी काढण्यात येते. दिंडीचे यावर्षीचे हे ३१६ वे वर्ष होते. आळंदीतून निघणारी संत ज्ञानेश्वरांची दिंडी, देहूतून निघणारी संत तुकोबांच्या दिंडी एवढेच महत्त्व जळगाव जिल्ह्यातून निघणाऱ्या संत मुक्ताईच्या दिंडीला देखील आहे.

महाराष्ट्रातील सर्वात लांब पल्ल्याची पालखी
आषाढी एकादशीला पंढरपुरात भरणाऱ्या यात्रेवेळी विठ्ठल रखुमाईसह संत ज्ञानेश्वर, संत निवृत्तीनाथ, संत तुकोबारायांच्या भेटीसाठी मुक्ताई निघतात अशी वारकऱ्यांची भावना आहे. महाराष्ट्रातील सर्वात लांब पल्ल्याची दिंडी म्हणून संत मुक्ताईच्या दिंडीची ओळख आहे. कोथळी गावात असलेल्या मुक्ताईच्या जुन्या मंदिरापासून दिंडीला सुरुवात होते.

संत मुक्ताईची दिंडी खानदेश, विदर्भ, मराठवाडा, तसेच पश्चिम महाराष्ट्रातून मार्गक्रमण करत ३३ दिवसांत तब्बल ७५० किलोमीटरचे अंतर पार करत पंढरपुरात दाखल होते. तत्पूर्वी वाखरी येथील रिंगण सोहळ्यात संत मुक्ताई, निवृत्ती तसेच ज्ञानेश्वर या बहीण भावंडांची भेट घडविली जाते. यावेळी संत मुक्ताईला साडीचोळीचा आहेर भावांकडून भेट दिला जातो. पंढरपूरमध्ये मुक्ताई दिंडीला प्रथम प्रवेशाचा मान दिला जातो.