रोहित कदम, साम टीव्ही

अचानक बिबट्या समोर दिसताच भल्या भल्यांची पाचावर धारण बसते... मात्र, जळगाव जिल्ह्यातील जामनेरमध्ये एका शेतकरी तरुणानं अंगावर शहारे आणणारं धाडस दाखवलंय. शहापूरचा रहिवासी असलेल्या मुकेश डोंगरे या शेतकऱ्यावर बिबट्यानं अचानक हल्ला केला. मात्र, मुकेशनं केवळ प्रतिकार केला नाही, तर त्यानं थेट मृत्यूलाच आव्हान दिलं. मुकेशनं जखमी अवस्थेतही आपल्या जिवाची बाजी लावत बिबट्याशी दोन हात केलेत. बिबट्यासोबतच्या जीवघेण्या झटापटीत मुकेश गंभीर जखमी झाला असून सध्या त्याच्यावर रुग्णालयात उपचार सुरू आहेत.

इतकंच नव्हे तर या पठठ्यानं चक्कं बिबट्याला पकडून वनविभागाच्या ताब्यातही दिलंय. त्यामुळे मुकेशचं सर्वच स्तरातून कौतुकाचा वर्षाव केला जातोय. मुकेशच्या धाडसाचं मंत्री गिरीश महाजन यांनी व्हिडिओ कॉलद्वारे संपर्क साधून कौतुक केलंय. राज्यात सर्वत्र बिबट्याची दहशत पाहायला मिळत असताना वाघाचं काळीज असलेल्या मुकेशनं चक्क बिबट्याला भिडून त्याला पकडण्याची करामत केलीय.