जामनेर (जळगाव) : नवरात्रोत्सवानिमित्ताने साखरादेवी यात्रेत देवीच्या दर्शनाला जाताना तरुणावर काळाने घाला घातला. जामनेर तालुक्यातील वाकोदजवळ दुचाकी आणि पिकअप वाहनांची समोरासमोर धडक झाल्याने हा भीषण अपघात झाला. यात एकाचा जागीच मृत्यू झाला. तर दुसरा गंभीर जखमी झाला आहे. 

जामनेर (Jamner) तालुक्यातील कुंभारी तांडा येथील अमोल शिवाजी गोसावी व आशिक गब्बर गोसावी हे वाकोद येथील साखरादेवी यात्रेनिमित्ताने देवीच्या दर्शनाला जात होते. देवीचे दर्शन घेऊन वाकोदच्या आठवडे बाजार असल्याने दसऱ्याचा बाजार करून येतो असं सांगून निघाले. गावापासून काही अंतरावर गेले असतांनाच वाकोदकडून तोंडापूरकडे भरधाव वेगाने जाणाऱ्या पिकअप वाहनाने मोटारसायकलला समोरून जोरदार (Accident) धडक दिली. यात अमोलचा जागीच मृत्यू झाला.

वाहनांची धडक जोरदार असल्याने अमोल घटनास्थळी रक्ताच्या थारोळ्यात पडलेला होता. तर त्याच्या सोबत असलेला एकजण गंभीर जखमी झाला आहे. घटनेची माहिती मिळताच पहुर पोलीस वेळीच दाखल होऊन सदर जखमीला पुढील उपचारासाठी रवाना केले. तर अपघातगस्त दुचाकी पहुर पोलीस स्टेशनला जमा करण्यात आली होती.