जळगाव : सायबर गुन्हेगारांकडून वेगवेगळ्या प्रकारे फसवणूक केली जाते. प्रामुख्याने गुंतवणुकीचे आमिष देत फसवणूक करण्याचे प्रकार मागील काही दिवसात वाढले आहे. अशाच प्रकारे जळगावतील एकाची शेअर मार्केटमध्ये पैसे गुंतवणूक करण्याच्या नावाने तब्बल ११ लाखात फसवणूक झाल्याचे समोर आले आहे. या प्रकरणी सायबर पोलिसात गुन्हा दाखल करण्यात आला आहे. 

जळगाव (Jalgaon) शहरातील एसएमआयटी कॉलेज परिसरातील संजय राजाराम वसतकार (वय ४२) यांच्याशी २८ जुलैला नारायण जिंदाल व चिन्मई रेड्डी यांनी संपर्क साधला. त्यांचा विश्वास संपादन करून वेगवेगळ्या ग्रुपमध्ये ॲड करून लिंक पाठविली. नंतर कोटक निओ नावाचे ॲप्लिकेशन डाउनलोड करून त्यात पैसे (Cyber Crime) गुंतविण्यास सांगितले. त्यानुसार संजय वसतकार यांनी पैशांची गुंतवणूक केली. त्यांनी गुंतविलेल्या पैशांवर वसतकार यांना दोन लाख ८२ हजार ५९९ रुपयांचा नफा झाल्याचे समोरच्याने सांगितले. 

दरम्यान, संशयितांनी संजय वसतकार यांच्याकडून वेळोवेळी ११ लाख ३० हजार ४७ रुपये ऑनलाइन बँकिंगद्वारे वेगवेगळ्या बँक खात्यात स्वीकारले. काही दिवसांनंतर गुंतवणुकीवर झालेल्या नफ्याची रक्कम काढता येत नसल्याचे संजय वसतकार यांच्या लक्षात आले. यानंतर त्यांनी सायबर पोलिसांत (Cyber Police) तक्रार दिली. त्यावरून नारायण जिंदल व चिन्मई रेड्डी या दोघांविरुद्ध सायबर पोलिसांत गुन्हा दाखल झाला आहे. पोलिस निरीक्षक नीलेश गायकवाड तपास करीत आहेत.