संजय महाजन, जळगाव

जळगावमध्ये प्रेमविवाह केल्यामुळे संतप्त झालेल्या मुलीच्या कुटुंबीयांनी तरुणासह त्याच्या कुटुंबीयांवर जीवघेणा हल्ला केला होता. या हल्ल्यात तरुणाचा मृत्यू तर ५ जण गंभीर जखमी झाले आहेत. या घटनेनंतर आज तरुणाच्या कुटुबीयांनी आरोपीचे घर जाळण्याचा प्रयत्न केला. पोलिसांमुळे मोठा अनर्थ टळला. याप्रकरणी १० जणांविरोधात गुन्हा दाखल करण्यात आला आहे.

मिळालेल्या माहितीनुसार, जळगावच्या पिंप्राळा हुडको येथे प्रेमविवाह केला या रागातून तरुणाच्या कुटुंबावर हल्ला करून तरुणाचा खून केल्याची घटना घडली. या घटनेमध्ये मयत तरुणाच्या कुटुंबीयांच्या नातेवाईकांच्या वतीने आज आरोपींचे घर जाळण्याचा प्रयत्न करण्यात आला. या ठिकाणी बंदोबस्तासाठी असलेल्या पोलिस कर्मचाऱ्यांमुळे पुढील अनर्थ टळला आहे.

याप्रकरणी १० जणांविरोधात पोलीस ठाण्यात गुन्हा दाखल करण्यात आला असून सात जणांना पोलिसांनी अटक केल्याची माहिती पोलिस अधीक्षक डॉ. महेश्वर रेड्डी यांनी दिली आहे. दरम्यान, मुकेश शिरसाठ या तरुणाने प्रेमविवाह केल्यामुळे संतप्त झालेल्या मुलीच्या कुटुंबीयांनी भरदिवसा मुकेशसह त्याच्या कुटुंबीयांवर हल्ला केला होता. या घटनेमुळे परिसरात खळबळ उडाली आहे.

शिरसाठ कुटुंबावर ७ ते ८ जणांनी चॉपर, कोयता, चाकू आणि लाकडी काठ्यांच्या सहाय्याने जीवघेणा हल्ला केला. या हल्ल्यात गंभीर जखमी झालेल्या २६ वर्षीय मुकेश शिरसाठचा मृत्यू झाला होता. तर ५ जण गंभीर जखमी झाले. जखमींवर जळगावच्या जिल्हा शासकीय रुग्णालयामध्ये उपचार सुरू आहेत. या घटनेनंतर तरुण आणि तरुणीच्या घराबाहेर पोलिसांनी कडक बंदोबस्त तैनात करण्यात आला आहे.