जळगाव : सकाळी विद्यार्थ्यांना शाळेत सोडण्यातही जात असताना रॉंग साईडने आलेल्या स्कूल व्हॅनने सायकलस्वारास जोरदार धडक दिली. यात सायकलस्वार वृद्धाचा जागीच मृत्यू झाल्याची घटना जळगाव शहरातील इच्छादेवी चौकात घडली. घटनास्थळी मोठा जमाव जमला होता. तर यावेळी संतप्त जमावाने स्कूल व्हॅनची तोडफोड केली. 

जळगाव शहरातून गेलेल्या महामार्गावरील इच्छादेवी चौक परिसरात हा भीषण अपघात १६ सप्टेंबरला सकाळी सव्वासहा वाजेच्या सुमारास घडला. या अपघातात शहरातील खंडेराव नगर परिसरात वास्तव्यास असलेले वसंत पाटील असे मृत झालेल्या वृद्ध व्यक्तीचे नाव आहे. दरम्यान खासगी संस्थेत सुरक्षारक्षक म्हणून कार्यरत असलेले वसंत पाटील हे रात्र पाळीची ड्युटी आटोपून सायकलने घराकडे जाण्यासाठी निघाले होते. 

विरुद्ध दिशेने आलेल्या व्हॅनने दिली धडक 

दरम्यान ते इच्छादेवी चौकात पोहोचले असता समोरून विरुद्ध दिशेने जोरात आलेल्या स्कूल बसने सायकलला जोरदार धडक दिली. धडक इतकी जोरदार होती, की वसंत पाटील हे रस्त्यावर फेकले गेले. यात गंभीर जखमी झाले. यानंतर काही वाहन धारकांनी त्यांना तत्काळ शासकीय वैद्यकीय महाविद्यालयात दाखल केले. मात्र, वैद्यकीय अधिकारी डॉ. हनिफा मोमिन यांच्या टिमने तपासणीअंती त्यांना मृत घोषित केले. 

संतप्त जमावाकडून गाडीची तोडफोड 
दरम्यान अपघात घडल्यानंतर आजूबाजूच्या परिसरातील नागरिक तसेच रस्त्याने जाणाऱ्या नागरिकांना मोठा जमाव येथे जमला होता. यावेळी संतप्त जमावाने गाडीच्या काच फोडत तोडफोड केली. यानंतर पोलिसांनी घटनास्थळी येत जमावाला पांगविले. यानंतर पंचनामा करत अकस्मात मृत्यूची नोंद करण्यात आली असून जिल्हापेठ पोलिसांत गुन्हा दाखल करण्यात आला.