अक्षय शिंदे, जालना|ता. १३ जून २०२४

सगेसोयऱ्यांच्या अंमलबजावणीसाठी मराठा नेते मनोज जरांगे पाटील यांनी पुन्हा एकदा बेमुदत उपोषण सुरू केले आहे. अंतरवाली सराटीमध्ये सुरू असलेल्या या उपोषणाचा आजचा सहावा दिवस असून जरांगे पाटलांची प्रकृती खालावत असल्याचे दिसत आहे. आता मनोज जरांगे यांच्या आंदोलनावर तोडगा काढण्यासाठी सरकार दरबारी हालचाली सुरू झाल्या असून आज राज्य सरकारचे शिष्टमंडळ जालन्यामध्ये दाखल होणार आहे.

लोकसभा निवडणुकांनंतर राज्यात मराठा आरक्षणाचा मुद्दा पुन्हा एकदा तापल्याचे दिसत आहे. ८ जूनपासून मनोज जरांगे पाटील यांनी बेदुमत उपोषण सुरू केले आहे. गेल्या सहा दिवसांपासून जरांगेंचे उपोषण सुरू असून त्यांची प्रकृती खालावत चालली आहे. अशातच त्यांनी जोपर्यंत सरकार ठोस भूमिका घेणार नाही, तोपर्यंत उपचार घेणार नाही, अशी भूमिका घेतली होती.

मनोज जरांगे पाटलांच्या या इशाऱ्यानंतर त्यांच्या मागण्यांवर तोडगा काढण्यासाठी सरकार दरबारी हालचाली सुरू झाल्या आहेत. याच पार्श्वभूमीवर आज मंत्री शंभूराज देसाईंचे शिष्टमंडळ अंतरवाली सराटीमध्ये येणार आहे. मनोज जरांगे पाटील यांनी सोडावे या संदर्भात शिष्टमंडळ चर्चा करणार आहे.

दरम्यान, बीडचे खासदार बजरंग सोनवणे यांनीही मनोज जरांगे पाटील यांची रात्री भेट घेतली. यावेळी त्यांनी जरांगे पाटील यांच्या तब्येतीची चौकशी केली. तसेच राज्यातील सर्व खासदारांना सोबत घेऊन राज्यपालांची भेट घेणार असल्याचेही त्यांनी सांगितले.