सचिता दीपक बोरसे... अवघ्या अडीच महिन्यांचं हे गोंडस बाळ. जिल्हा परिषद शाळेत आयोजित लसीकरण मोहिमेदरम्यान सचिताला पोलिओ आणि पेंटा लशीचा दुसरा डोस सोबत देण्यात आला. त्यानंतर काही मिनिटांतच ती बेशुद्ध पडल्याचा दावा तिच्या आजोबांनी केला. त्यामुळे तिला चाळीसगावच्या खाजगी रुग्णालयात दाखल करण्यात आलं. मात्र डॉक्टरांनी तपासणीनंतर तिला मृत घोषित केलं. लस देण्यापूर्वी तिची प्रकृती उत्तर होती आणि खेळतही होती असा दावा कुटुंबीयांनी केलाय़. तर लस दिल्यानंतर सचिताला घरी नेलं. घरी गेल्यानंतर ती झोपली आणि त्यानंतर ती उठलीच नसल्याचा दावा अतिरिक्त जिल्हा शल्य चिकित्सकांनी केलाय.

आरोग्य व्यवस्थेचा हलगर्जीपणा ?

लस देण्यापूर्वी तिथल्या आरोग्य अधिकाऱ्यांनी तिची प्राथमिक तपासणी केली होती का ?

अडीच महिन्यांच्या चिमुकलीला झेपेल असाच तो डोस होता का?

लसीकरणाच्या ठिकाणी आपत्कालीन स्थिती हाताळण्यासाठी तज्ज्ञ डॉक्टर हजर होते का

मात्र सचिताच्या मृत्यूनंतरही आरोग्य यंत्रणांची क्रूरता थांबली नाही. या दुर्देवी घटनेनंतर पोलिसांच्या मदतीने बालिकेचा मृतदेह शवविच्छेदनासाठी जळगावच्या जिल्हा रुग्णालयात नेलं. मात्र तिथे तर माणुसकी वेशीला टांगल्याचा अनुभव घरच्यांना आला. रात्री उशिरा मृतदेह आणला, म्हणून कर्मचाऱ्यांनी तो ताब्यात घेण्यास नकार दिला. रात्री शवविच्छेदन करू नका, मात्र किमान माणुसकी म्हणून मृतदेह शवपेटीत ठेवून घ्या असं आजोबांनी मोठ्या पोटतिडकीनं सांगितलं...मात्र जिल्हा रुग्णालयातल्या कर्माचाऱ्यांना जराही पाझर फुटला नाही. अखेर आपल्या अडीच महिन्यांच्या नातीचा गारठलेला मृतदेह रात्रभर मांडीवर घेऊन आजोबा तसेच बसून राहिले. शासकीय रुग्णालयाच्या आवारात माणुसकीचा थरकाप उडवणारे हे दृश्य पाहून उपस्थितांचे डोळे पाणावले, पण 'सिस्टम' मात्र झोपलेली होती.

या घटनेतील आणखी एक क्लेशदायक बाब म्हणजे, चिमुकलीचे वडील दीपक बोरसे हे भारतीय सैन्यात कार्यरत असून सध्या अयोध्येत देशाची सेवा करत आहेत...ज्या बापाच्या खांद्यावर देशाच्या संरक्षणाची जबाबदारी आहे, त्याच्या लेकीचा तर आरोग्य यंत्रणांच्या हलगर्जीपणामुळे बळी गेलाच..मात्र मृत्यूनंतरही तिची हेळसांड थांबली नाही. केवळ चौकशीचे आदेश देऊन हा विषय मिटणार नाही, तर या 'अमानवीय' कृत्यासाठी जबाबदार असणाऱ्या चाळीसगावपासून जळगावपर्यंत सर्व संबंधित आरोग्य कर्मचाऱ्यांची

कडक कारवाई केली तरच सचिताला न्याय मिळणार नाही.