सागर आव्हाड, साम टीव्ही, प्रतिनिधी

इतिहास अभ्यासक इंद्रजित सावंत यांना फोनवरुन दिलेल्या धमकी प्रकरणात अपडेट समोर आली आहे. छत्रपती शिवाजी महाराज यांच्याबद्दल अपशब्द बोलणाऱ्या आणि इंद्रजित सावंत यांना धमकी देणाऱ्या प्रशांत कोरटकरकडे रोल्स रॉयस ही आलिशान कार कशी आली याचा सीआयडीने तपास सुरु केला आहे. ही कार चिट फंड घोटाळ्यातील आरोपी महेश मोतेवारच्या मालकीची असल्याचे समोर आले आहे.

प्रशांत कोरटकरकडे असलेली कोट्यावधी रुपयांची रोल्स रॉयस कार ही मोतेवारच्या समृद्ध जीवन फूड्स इंडिया लिमिटेड कंपनीच्या नावावर आहे. चिट फंड घोटाळ्यावरुन जेव्हा महेश मोतेवारला अटक झाली होती, तेव्हा ही कार सीबीआयने ब्लॉक केली होती. परिणामी सीबीआयने या कारवर विकायला बंदी घातली होती. असे असूनही रोल्स रॉयस कार प्रशांत कोरटकर वापरत असल्याचे दिसून आले आहे. त्यामुळे सीआयडीकडून या कारबद्दल ईमेलद्वारे गाडीबद्दल माहिती विचारण्यात आली आहे.

महेश मोतेवारवर चार हजार सातशे कोटी रुपयांची फसवणूक केल्याचा आरोप आहे. डिसेंबर २०१५ मध्ये पोलिसांनी मोतेवारला अटक केली होती. देशातील २२ राज्यांमध्ये मोतेवारच्या नावावर २८ गुन्ह्यांची नोंद झाली. मोतेवारची संपत्ती जप्त करुन त्यांचा लिलाव करण्यात आला. याच दरम्यान मोतेवारची रोल्स रॉयस कार ब्लॉक करण्यात आली होती. मग ही कार प्रशांत कोरटकरकडे कशी आली याचा तपास सीआयडी करत आहे. या कारची किंमत सात ते आठ कोटी रुपये आहे असे म्हटले जात आहे.

इंद्रजित सावंत यांना धमकी देणाऱ्या प्रशांत कोरटकर विरोधात नागपूरमध्ये गुन्हा दाखल करण्यात आला आहे. या प्रकरणाचा तपास कोल्हापूर पोलीस करणार आहेत. नागपूर पोलिसांनी दाखल केलेला गुन्हा कोल्हापूर पोलिसांकडे गेल्याची माहिती समोर आली आहे. कोल्हापूरच्या प्रकरणात कोरटकरला अटकपूर्व जामीन मिळाला आहे.