राज्यावर मोंथा चक्रीवादळाचं संकट कायम असल्याने पावसाने महाराष्ट्रात पुन्हा हजेरी लावली आहे. आज सकाळपासून मुंबईसह उपनगरात पावसाच्या कोसळधारा पाहायला मिळाल्या आहेत. ‘मोंथा’ चक्रीवादळ निवळल्यानंतर कमी दाबाचे क्षेत्र मध्य प्रदेशाकडे सरकत आहे. आज उत्तर कोकण, उत्तर महाराष्ट्र, विदर्भात विजांसह पावसाची शक्यता असल्याने हवामान खात्याने येलो अलर्ट दिला आहे.

‘मोंथा’ चक्रीवादळ निवळल्यानंतर कमी दाबाचे क्षेत्र मध्य प्रदेशाकडे सरकत असल्याने पावसाला परिपूर्ण वातावरण राज्यात निर्माण झाले आहे. गुरुवारी सकाळपर्यंतच्या २४ तासांमध्ये सिंधुदुर्गमधील मालवण आणि रत्नागिरी येथे सर्वाधिक १२० मिलिमीटर पाऊस झाला. कोकणातील रामेश्वर, सावर्डे, गुहागर, जव्हार, जालना, वाशीम जिल्ह्यातील येथे ७० मिलिमीटर पेक्षा अधिक पाऊस झाल्याने अतिवृष्टीची नोंद झाली. उर्वरित राज्यात काही ठिकाणी हलक्या ते मध्यम सरींनी हजेरी लावली. पावसाच्या हजेरीने राज्याच्या कमाल तापमानात हळूहळू घट होऊ लागली आहे.‎ ‎सांताक्रूझ येथे राज्यातील सर्वाधिक ३४.५ अंश सेल्सिअस तापमानाची नोंद झाली.

आज सकाळी मुंबईसह उपनगरात पासने दमदार हजेरी लावली. सकाळच्या सुमारास अचानक आलेल्या पावसाने कामावर जाणाऱ्या नोकरदार वर्गाची चांगलीच तारांबळ उडाली आहे. मुंबईसह आज कोकणातील रायगड जिल्ह्यात जोरदार पावसाचा, तर पालघर, नंदूरबार, धुळे, जळगाव, नाशिक, छत्रपती संभाजीनगर, अमरावती, नागपूर, भंडारा, गोंदिया, चंद्रपूर, गडचिरोली या जिल्ह्यांत विजांसह पावसाचा अंदाज असल्याने हवामान खात्याने येलो अलर्ट दिला आहे.

उर्वरित राज्यात अंशतः ढगाळ हवामानासह, हलक्या पावसाची, तसेच कमाल तापमानात चढ-उतार होण्याची शक्यता वर्तविण्यात आली आहे. दरम्यान हवामानात होणाऱ्या चढउताराने ताप, सर्दी, खोकला सारखे आजार डोकं वर काढत आहेत. हवामान खात्याने सांगितल्यानुसार, आजचा संपूर्ण दिवस महत्त्वाचा असून राज्यात ऊन पावसाचा लपंडाव कायम राहणार आहे.